Lingue Vive : duie appiecazione per u sviluppu di a lingua corsa
Creatu in u 2016 da Vincent paoli è a so moglia Carina,....
Lingue vive : duie appiecazione per u sviluppu di a lingua corsa
Creatu in u 2016 da Vincent Paoli è a so moglia Carina, iss’associu vole mette in piazza un arnese dedicatu à i parenti per amparà u corsu à i so zitelli. U scopu hè, à tempu, d’andà aldilà…
Oftalmologu in Aiacciu, Vincent Paoli hè, cum’è tanti corsi, arradicatu à a so lingua o e so tradizione. Ancu s’ellu hà sempre difficultà à praticà, porta sempre, in pettu à ellu, issu stintu nustrale ch’ùn si pò spiegà. « In paese, spiega l’oftalmologu, tuttu u mondu parlava corsu, ma mi manca sempre a pratica. Quandu sò statu babbu, aghju vulsutu purtà a me petra, per prupone à tutti i parenti, qualcosa chì li permettia di parlà à i so zitelli è tramandà a so lingua. Di fattu, è da dui à sei anni, i zitelli anu u ciarbellu vergine, ponu amparà monda per ammaestrà più tardi... »
Un arnese per tutte e lingue regiunale
Impegnatu à prò di a salvezza di a lingua corsa, Vincent Paoli hà l’idea, cinque anni fà, cù a so moglia Carina, di creà « Lingue Vive », à u plurale per ghjustappuntu, permette d’adunisce d’altre à u so cuncettu. « Aghju avutu l’idea, arrimbatu nantu à me sperienza di babbu è, à tempu, ciò chì si facia altrò, di creà duie appiecazione dedicate à i zitelli. Una per i più chjuchi cù fiure, l’altra à partesi da fole corse... »
L’associu principia. Vincent ùn hè specialistu ancu s’ellu si sbroglia appena per ciò chì tocca à u numericu è l’infurmatica. « Aghju dumandatu u cuncorsu d’un studiu graficu per l’ullustrazione è di l’associu « Fioramossa » per u registramentu di e fole... »
U resultatu hè abbastanza bè : a prima appiecazione hè dedicata à i più chjuchi : nantu à parechje tematiche (animali mansi o salvatichi, i trasporti, i culori, l’animali marini, l’acelli, i frutti, i licumi, i mignoculi, i numari, i mobuli, a casa, i panni, i ghjoculi fora è nentru, a scola, a cucina…), i zitelli ponu ritruvà ghjuchendu... « Si pò induvinà ascultendu o truvà qualessu hè frà quattru fiure. L’inseme permette d’amparà un lessicu ma dinò infrasate, vucabulariu, ecc... »
A seconda appiecazione si cumpone di fole corse (A spusata, u capu tafunatu, u monte trettore, surnachellu) à adattate da l’Alsaccianu (u mulinu di u diavule, a donna misgiaghja…).
« Quì, si tratta di cuntà una storia. À spessu, per e fole corse, ci hè una leia impurtante cù l’affettu. Aldilà di u racontu, ci hè in ogni fiura, un disegnu da mintuà. Una manera, à tempu, di travaglià infrasate sane, strutture, ecc... »
Per avà, l’associu pò cuntà nantu à 2000 persone chì ponu aduprà di manera regulare l’appiecazione…adattate in duie parlate di l’isula : pumonte-viculacciu, nordu-levante… cù l’aiutu di José Gaggioli (Pumonte-Viculacciu), Ghjuvan Iviu Casalta (Nordu Levante). « Avemu da cercà à sviluppà u nostru prughjettu cù u suttanacciu (Rinatu Coti) è altrò. Ma s’è l’insegnanti u si pudarianu aduprà saria una bona ch’ellu pò esse dedicatu à i sculari. Vogliu ringrazià di core tutti quelli chì ci aiutanu è sopratuttu a CdC senza quella ùn avariamu pussutu fà issu prughjettu... »
Aldilà, l’associu vularia adunisce d’altre regione : Alsassia, Brittagna, Pruvenzia, Paese Bascu, Uccitania.L’occasione di francà d’altri passi. « Avemu dighjà 2000 personne n’aspettemu di più. » Per Vincent Paoli, ciò manca, ùn sò micca l’idee ma piuttostu u tempu. Ch’ellu ùn hà micca lasciatu u so mistieru d’oftalmologu…
Ph.P.
