A rinascita di a cunfraternita di Belgudè
A confraternita di Belgudè
A rinascita di a cunfraternita di Belgudè
Spartita guasgi un seculu (versu u 1926), a cunfraternita di u Santissimu Crucifissu di Belgudè hà ripigliatu u so volu di maghju scorsu. L’intrunizazione hè stata fatta u 19 di settembre davanti à u publicu maiò, abitanti di u paese, Balanini è ancu ghjente ghjunta da a Corsica sana. A messa hè stata celebrata, frà altri, da François Bustillo, u novu vescu è cantata da cunfratelli di u rughjone...
Si sà ch’in Corsica, fede, suciale è religione sò liati dapoi sempre. Hè per quessa chè, forse più quì, ch’in altrò, e cunfraternite anu un’impurtanza maiò. È seria dunque una logica di vede tantu mondu quandu una di isse strutture rinasce.
Mumentu maiò in Balagna è in Corsica u 19 di settembre scorsu, l’intrunizazione di a cunfraternita di u Santissimu Crucifissu di Belgudè hà adunitu un publicu impurtante. Un evenimentu monda aspettatu. « A nostra struttura hè rinata u 23 di maghju scorsu, spiega Larenzu Ceccaldi, priore di a cunfraternita, a ghjente l’aspettava assai è tuttu u mondu s’hè impegnatu.»
A messa hè stata celebrata, frà altri, da François Bustillo, u novu vescu, intornu à preti è diciottu cunfraternite ghjunte da a Corsica sana. Si capisce subbitu l’interressu ch’elli portanu i Corsi à isse strutture quì.
« D’aostu 2020, aghjusta u priore, avemu avutu l’idea di rilancià a cunfraternita cù d’altri cunfratelli di u circondu ghjunti à aiutà ci. Ci simu ritruvati à parechji, avemu fattu i statuti è avemu ripigliatu un filu sparitu dapoi guasgi u seculu. »
Una struttura sparita, cum’è tanti usi è tradizione corsi, dopu à a guerra di u 1914. Assai omi chì ne facianu parte, ùn sò, per disgrazia, micca vultati. Averà tinuta una decina d’anni nanzu di sparisce à partesi da u 1926. « Ùn avemu più trace dapoi... »
Una vucazione spirituale è suciale
Oghje, vintidui cunfratelli portanu a mantiletta nera, a cappa è u curdone rossi è u so coprifaccia, cum’è quelli di a cunfraternita di a Serra. Tutti si sò ritruvati u 23 di maghju scorsu, à l’occasione di a festa di u Santissimu Crucifissu, patrone di a struttura per una prima messa. E missione, ùn scambianu micca. « Per ciò chì tocca à u spirituale, seguitemu a liturgia ma a parte a più impurtante d’una cunfraternita è di a nostra in particulare, hè u suciale. Vale à dì, accumpagnà a ghjente inde a suffrenza, u dolu... Ancu s’è i paesi si viotanu, ci hè sempre issu bisognu. Seremu à fiancu à i nostri paisani. »
Frà e so prime azzione, a cunfraternita hà participatu, in Pigna, à un cuncertu maiò per racoglie soldi à prò di i paesi sardi brusgiati d’estate. E cunfraternite cuncernate sò d’altronde, pertute in Oristanu issa dumenicata per dui ghjorni di spartera, scambii è à tempu, per purtà un sustegnu finanziariu.
Ma u mumentu maiò, per i cunfratelli di u Santissimu Crucifissu fù di sicuru u 19 di settembre cù l’intrunizazione à l’occasione di a festa patrunale di u paese. « U nostru vescu ci hà fattu l’onore d’esse quì per presidà a ceremonia, aviamu centu cunfratelli à fiancu à noi, e sore di u cunventu di Marcassu, parechji preti, tutti l’abitanti di u paese. Avemu passatu un mumentu magnificu. »
Dopu à issu primu passu, i cunfratelli cercanu à mette in piazza e so missione. S’agisce, à tempu è à u nivellu di a liturgia, di rimette in vale, i canti religiosi chì sò spariti. « Femu un travagliu di ricerca è perchè micca, à più o menu longu andà, una creazione. »
Di nuvembre, anderanu in Roma à scuntrà i cunfratelli di San Marcello chì portanu li stessa tenuta. L’occasione, torna una volta, di sparte è scambià intornu à usi cumuni…
Ph.P.
Spartita guasgi un seculu (versu u 1926), a cunfraternita di u Santissimu Crucifissu di Belgudè hà ripigliatu u so volu di maghju scorsu. L’intrunizazione hè stata fatta u 19 di settembre davanti à u publicu maiò, abitanti di u paese, Balanini è ancu ghjente ghjunta da a Corsica sana. A messa hè stata celebrata, frà altri, da François Bustillo, u novu vescu è cantata da cunfratelli di u rughjone...
Si sà ch’in Corsica, fede, suciale è religione sò liati dapoi sempre. Hè per quessa chè, forse più quì, ch’in altrò, e cunfraternite anu un’impurtanza maiò. È seria dunque una logica di vede tantu mondu quandu una di isse strutture rinasce.
Mumentu maiò in Balagna è in Corsica u 19 di settembre scorsu, l’intrunizazione di a cunfraternita di u Santissimu Crucifissu di Belgudè hà adunitu un publicu impurtante. Un evenimentu monda aspettatu. « A nostra struttura hè rinata u 23 di maghju scorsu, spiega Larenzu Ceccaldi, priore di a cunfraternita, a ghjente l’aspettava assai è tuttu u mondu s’hè impegnatu.»
A messa hè stata celebrata, frà altri, da François Bustillo, u novu vescu, intornu à preti è diciottu cunfraternite ghjunte da a Corsica sana. Si capisce subbitu l’interressu ch’elli portanu i Corsi à isse strutture quì.
« D’aostu 2020, aghjusta u priore, avemu avutu l’idea di rilancià a cunfraternita cù d’altri cunfratelli di u circondu ghjunti à aiutà ci. Ci simu ritruvati à parechji, avemu fattu i statuti è avemu ripigliatu un filu sparitu dapoi guasgi u seculu. »
Una struttura sparita, cum’è tanti usi è tradizione corsi, dopu à a guerra di u 1914. Assai omi chì ne facianu parte, ùn sò, per disgrazia, micca vultati. Averà tinuta una decina d’anni nanzu di sparisce à partesi da u 1926. « Ùn avemu più trace dapoi... »
Una vucazione spirituale è suciale
Oghje, vintidui cunfratelli portanu a mantiletta nera, a cappa è u curdone rossi è u so coprifaccia, cum’è quelli di a cunfraternita di a Serra. Tutti si sò ritruvati u 23 di maghju scorsu, à l’occasione di a festa di u Santissimu Crucifissu, patrone di a struttura per una prima messa. E missione, ùn scambianu micca. « Per ciò chì tocca à u spirituale, seguitemu a liturgia ma a parte a più impurtante d’una cunfraternita è di a nostra in particulare, hè u suciale. Vale à dì, accumpagnà a ghjente inde a suffrenza, u dolu... Ancu s’è i paesi si viotanu, ci hè sempre issu bisognu. Seremu à fiancu à i nostri paisani. »
Frà e so prime azzione, a cunfraternita hà participatu, in Pigna, à un cuncertu maiò per racoglie soldi à prò di i paesi sardi brusgiati d’estate. E cunfraternite cuncernate sò d’altronde, pertute in Oristanu issa dumenicata per dui ghjorni di spartera, scambii è à tempu, per purtà un sustegnu finanziariu.
Ma u mumentu maiò, per i cunfratelli di u Santissimu Crucifissu fù di sicuru u 19 di settembre cù l’intrunizazione à l’occasione di a festa patrunale di u paese. « U nostru vescu ci hà fattu l’onore d’esse quì per presidà a ceremonia, aviamu centu cunfratelli à fiancu à noi, e sore di u cunventu di Marcassu, parechji preti, tutti l’abitanti di u paese. Avemu passatu un mumentu magnificu. »
Dopu à issu primu passu, i cunfratelli cercanu à mette in piazza e so missione. S’agisce, à tempu è à u nivellu di a liturgia, di rimette in vale, i canti religiosi chì sò spariti. « Femu un travagliu di ricerca è perchè micca, à più o menu longu andà, una creazione. »
Di nuvembre, anderanu in Roma à scuntrà i cunfratelli di San Marcello chì portanu li stessa tenuta. L’occasione, torna una volta, di sparte è scambià intornu à usi cumuni…
Ph.P.
