Petru Guelfucci : a Corsica in dolu

Petru Guelfucci : a Corsica in dolu

S’hè spentu a settimana scorsa Petru Guelfucci, famosu cantadore isulanu à l’età di sessanta sei anni è dopu una longa malatia. Omu di stintu, difensore d’un patrimoniu tradiziunale in periculu, a so voce linda, forse una di e più belle di Corsica, hà sulcatu un chjassu tamantu per tante generazione d’eri è dumane…


Quand’ella hè cascata a nutizia, l’ottu d’ottobre scorsu da per tuttu in Corsica, nimu ùn la vulia crede. Malatu issi qualchì tempu, Petru Guelfucci era pertutu in Marseglia. Hè quì ch’ellu s’hè spentu.

Per quelli ch’ùn l’anu troppu cunnisciutu, i più ghjovani, era una voce linda, quella diventata famosa cù l’innu à a so isula cara « Corsica », cantata d’altronde cù Patrick Bruel nantu à u dischettu « Mezu, mezu ». Una voce scuperta nantu à i so primi dischetti solu à partesi da l’annu 1987. Tandu, « Cavallu », « Canta cù mè », « Catalinetta », anu fattu a so nuturietà in Corsica ma sopratuttu aldilà. Masimu à u Canadà induve ellu si chjappò u discu d’oru. Una carriera cuntinuata sempre à prò di a so lingua materna cù parechji dischetti, cuncerti è sopratuttu issu bellu percorsu cù a squadra di « Mezu mezu » induve ellu canterà « Corsica » cù Bruel è « Furtunatu » cù Francis Cabrel.



Un impegnu puliticu è culturale

Quelli chì sò più anziani è masimu i passiunati di cantu tradiziunale ne cunnoscenu appena di più nantu à u percorsu di Petru Guelfucci. Natu in Sermanu u 6 di marzu di u 1955, hè ciuttatu, da zitellu ind’un cantu nustrale ind’una pieve, quella di u Boziu, induve sò nati tanti cantadori è sunadori di viulinu famosu. Sermanu, unu di i veculi di a paghjella. Cusì, à dighjà 14 anni, Petru canta cù u gruppu « A manella », una logica per un zitellu natu ind’una famiglia di cantadori. U so babbu, Felice Antone serà forse unu di i più famosu testimogni d’un manera di trincà u viulinu particulare. Ma Petru Guelfucci franca un passu, dopu à l’affare di e cianghe rosse o di l’Argentella cù un sintimu più puliticu.
Cù qualchì amicu di l’epica, (Ghjuvan Paulu Poletti, Alain Bitton dettu Minicale, Natale Luciani, Saveriu Valentini, Ceccè Buteau…), nasce u gruppu miticu « Canta u populu corsu », portavoce in issi tempi quì, di rivindicazione à tempu pulitiche è culturale. « Simu sbanditi », « Bruscu », « U vagabondu », « Ghjennaghju », «Ci hè dinò », « Vergogna à tè », « Citadella da fà » eccu qualchì canzona induve ellu face sente a so voce particulare cù e so rivucate sermanaccie...À tempu, si sentenu canti in paghjella cum’è « Lettera à mamma » « Barbara Furtuna » o « Terzetti di u piuvanu ». Un cantu induve s’impegnerà monda purtendu a so petra à a ricunniscenza di a paghjella à u patrimoniu mundiale di l’Unesco.

Ma Petru, ùn era solu una voce. Avia, à tempu, un certu estru paisanu sculpitu ind’u so Boziu natale, ellu chì fù agricultore, bugnaghjolu per isse muntagne. Ghjè un pocu di tuttu a so vita ch’ellu purtava nantu à e scene o e so canzone. U stintu, u core è l’amore di a so terra, issu qualcusellu chì và aldilà d’una nota di musica. È chì si sente da u publicu. È s’è a Corsica sana hè, oghje, in dolu, seria perchè tuttu u mondu hà persu qualchissia chì, à un mumentu datu di u so percorsu, l’hà purtatu un pocu di l’identità corsa…