U filu storicu di << A Balisaccia >>

U filu storicu di « A Balisaccia »

Ripigliatu da una squadra nova di ghjennaghju scorsu, « A Balisaccia » stabilimentu piazzatu nantu à strada di Saone, hè monda più ch’una usteria o un caffè…


Semu nantu à a strada di Saone, subbitu dopu à u giratoghju d’Afà. Hè quì chè di ghjennaghju scorsu, Ghjuvan Lavighju Ghiddi, Martinu Squarcini è Letizia Andrei, tutti figlioli di u circondu, anu decisu, di ripiglià « A balisaccia », un stabilimentu cunnisciutu in u rughjone sanu.


Un affare di « valisgia »

In u 1908 ci era una cansa induve paisani è mulatteri si piantavanu nanzu di ripiglià a strada verdi a bocca di San Bastianu, Carghjese o i paesi di i Dui Sorru. Si durmia, si manghjava è si facia ancu ripusà i cavalli. Un ghjornu, un omu s’era scurdatu di a so valisgia, à cantu à a funtana, vicinu. « Di quali hè issa valisgiaccia… ? » dicia a ghjente. Cusì, da valisgia, valisgiaccia, semu passati à Balisaccia chì, in fine, hà datu u so nome à u locu. È un stabilimentu chì dapoi un seculu hà fattu a so strada.

Nentru, dopu à qualchì discurzata, si capisce subbitu ch’è noi semu solu ind’un locu induve si piglia l’aperitivu, un pranzu o un caffè.

« Semi tutti fiddoli di u circondu, spiega Martinu Squarcini, emi vulsutu tena issu spiritu nustrali cunnsciutu quandu erami ziteddi. Lucien Pirrolu, l’anzianu patroni, era un amicu di u me missiavu. Andavani à caccighjà insemi. »


Un spiritu paisanu

Cacciadori, spinghjifochi, paisani, travagliadori, cantadori, agricultori, vechji, ghjovani, tante generazione anu mantenutu un certu filu nustrale. Locu di scambiu, spartera, amicizia induve u spiritu di i tempi fà hè sempre quì. Un spiritu paisanu chì si risente d’altronde subbitu. « U scopu, aghjusta u respunsevule, hè nanzi à tutti di cuntinuà à fà campà u locu... »

S’è u spiritu hè mantenutu, a squadra vole dà un fiatu novu à l’inseme. Vale à dì u cuntenutu. Tandu, anu fattu travagli : una sala dedicata à l’usteria, duie terrazze, è u locu di caffè cù una sala induve si canta, chè Martinu è Ghjuvan Lavighju facenu parte di u gruppu « Cuscenza». Duie ghitarre sò appicate nantu à un muru s’è qualchissia t’hà a voglia di cantà qualcosa. Vicinu à u parastaghju, ci sò i nomi di tutti i gruppi corsi ancu quelli ch’ùn esistanu più... « Una volta à settimana, ricivimu à Matteu Casanova è a squadra di « U Cantu di a Trova » o ancu u so gruppu « Primavera » per una repetizione. »

À l’apertura, di ferraghju, u prete Boccheciampe hè ghjuntu à dà a so benedizzione à u locu. È dopu, e visite ùn mancanu micca : Antò Lippini, anzianu ghjucadore di l’ACA è u GFCA, Rémy Cabella, chì stà ind’è i so parenti in Afà quandu ellu ghjunghje in vacanze, Marina Raibaldi, Marie-Agne Geronimi, eccu qualchì « persunalità » di u mondu spurtivu è culturale chì si canzanu di tantu in tantu à a Balisaccia.

Ma hè dinò un locu induve si pò manghjà un burger « nustrale », carne, pizza, insalate, casgiu... »Travaddemi cù i pruduttori di u circondu : Petru Pà Faggianelli è Alanu Ferucci (casgiu), Stefanu Andarelli (robba purcina), « Sicretu d’Apa » (mele). È Letizia travadda quì tutta a settimana è codda a dumenicata in Casta à fà l’oliu d’alivu è a mortula... »

S’è, per avà, tuttu si passa abbastanza bè cù issu filu nustrale tramandatu, a strada chì s’hà da apre in faccia à u locu dà pinseri à l’associ. «Un semi mai stati à capu d’issu scambiamentu. Risichemi di perda assai passaghju. Speremi quantnuqua di sbuccà nantu à una suluzioni... »

Benchè minacciatu, u stabilimentu conta nantu à so estru – è appena di sustegnu di l’eletti- per mantene una storia di più d’un seculu.

F.P

A Balisaccia, 20167 Alata
tel : 04-95-71-89-96


Légende photo : Albert è Françoise Gelly, pruprietarii di i muri (camisge chjare), circundati da a squadra nova è amichi di sempre u ghjornu di l’inaugurazione