"Tutti inseme per Arburi" ,Rivinvisce e tradizione culturale è patrimuniale di u paese
Natu una vintena d'anni fà, è ripigliatu in u 2016,.....
« Tutti inseme per Arburi », Rivinvisce e tradizione culturale è patrimuniale di u paese
Natu una vintena d’anni fà, è ripigliatu in u 2016, issu associu cerca à mette in vale a ricchezza patrimuniale di u paese, intornu à a reabilitazione di u famosu signore Da Leca, persunaghju impurtante di u medievu corsu…
U cantone di i Dui Sorri hà un’impurtanza maiò in a storia di Corsica. Si sà chè Letizia Bonaparte ghjunse à ciuttà si incinta di Napuliò, in i Bagni di Guagnu. Sempre in stu paese quì, ritruvemu à u famosu prete Circinellu. Vicu hè abbastanza cunnisciutu è rinumatu à u nivellu religiosu (U vescu Casanelli d’Istria, u cardinale Mamberti…), puliticu (Pasquale Arrighi…) è tanti altri. Ma a lista ùn s’arresta micca quì. Arburi, paese vicinu da Vicu hè dinò impurtante. U pueta Santu Casta è u fundatore di a Muvra Petru Leca, sò nati quallà. Ma quelli chì sò passiunati di storia è masimu di u Medievu a sanu chè dui castelli trà Arburi è Muna sò sempre stati mintuati da l’uralità. Sapemu dinò chè in u rughjone, i Leca sò a bbastanza numerosi. In fine, i Cinarchesi anu sulcatu a so storia à traversu i so castelli spertuti trà Tiuccia è Portu è ancu sin’à Guagnu…
Reabilità a memoria di u so paese, è à tempu quella di Ghjuvan Paulu da Leca, persunaghju impurtante di u Medievu Corsu cù tutti i Cinarchesi, eccu u scopu di l’associu « Tutti inseme per Arburi » nantu una vintena fà ma ripigliatu dapoi sei anni da una squadra nova. Ritruvemu oghje, à Paul Campana, u presidente, Marie-Françoise Colonna, Vannina Leca, Jean-Do Albertini, Marc Trojani, Caroline Belleudy è d’altri chì sò ghjunti à arricchisce u scagnu a settimana scorsa. Una squadra nova per d’altri pughjetti ambiziosi. « In u 2016 è u 2017, spiega Paul Campana, anu principiatu per u trail cù assai participanti. Oghje, avemu più di ottanta membri è dapoi trè anni, avemu vulsutu travaglià intornu à u patrimoniu è mette in vale u nostru paese arrimbatu nantu à a memoria di i Leca, persunaghji maiò di u Medievu postu chè u signore cirnachese Ghjuvan Paulu avia unu di i so castelli i più impurtanti quì : u famosu « Castaldo ».
Ver di una ghjurnata patrimuniale...
Cusì è dopu à vestichi fatti sopra locu da archeologhi, i respunsevuli di l’associu si sò aduniti intornu à un prughjettu maiò nantu à i Leca. « Avemu travagliatu nantu à l’arme di i Leca, aghjusta u presidente, è à cantu à què nantu à a cummercialisazione. Cusì ci sò scatulette di a biscutteria d’Afà cù l’arme di i Leca ch’anu da esce. Travagliemu dinò nantu à ghjuvelli specifichi chì sarianu fatti da Saveria Geronimi, una zitella di u paese è pastizzerie di « Les délices de Mezzavia ».
Bulicà anzianu è mudernu, eccu dinò u scopu di l’associu chì hà dighjà fattu e so prove cù u Carnavale festighjatu dapoi qualchì annu. L’idee, frà l’ambiente, a tupunimia è u patrimoniu, ùn mancanu micca.
« Avemu messu in vale, i chjassi patrimuniale, travagliemu à a reabilitazione di i siti religiosi cum’è quellu di Parapoghju chì festighjeghja à Santa Cristina. U scopu avà, hà da esse d’urganizà iss’estate è s’è e cundizione sanitarie e permettenu, una ghjurnata dedicata à a memoria di u paese cù messa in vale di i nostri artisgiani, mostre, cunferenze è musiche tradiziunale liate à issa perioda quì. À più o menu longu andà, vulemu sparghje un nostru cuncettu à d’altri paesi di u rughjone. »
L’occasione di fà campà, intornu à una vulintà cumuna, a memoria antica fendu a leia trà eri è oghje...
F.P
