Doria ousset vince u liet internaziunale !
L'artista insulana hà vintu, u tredeci di maghju scorsu, l'edizione 2022 di u Liet Internaziunale chì era Urganizata in Tonder ( Danemarcu ).
Doria Ousset vince u liet internaziunale !
L’artista insulana hà vintu, u tredeci di maghju scorsu, l’edizione 2022 di u Liet Internaziunale chì era urganizata in Tonder (Danemarcu).Una vittoria chì quattordeci anni dopu à quella di Ghjacumu Culioli, face a prumuzione di a lingua è a cultura corsa...
A Corsica hà vintu u Liet Internaziunale per a seconda volta dopu à a vittoria di Ghjacumu Culioli cù « Hosanna » quattordeci anni fà. Sta volta, ghjè Doria Ousset, artista corsa assai rinumata chì s’hè imposta in u Nordu di l’Auropa (Tonder, cità di u Danemarcu) cù « Roma ». Scritta da Paulu Turchi Duriani, issa canzona ci conta a storia dulurosa di a cumunità corsa in a cità taliana à u diciottesimu seculu. L’acconci musicali, chì mischianu tradiziunale è versi più muderni bulicati cù a voce linda di Doria, anu cunvitu a ghjuria.
U colpu di core di a ghjuria
À l’iniziu, eranu tredeci ghjunti da paesi o rughjoni induve ci hè una lingua minuritaria (cuncettu di a manifestazione), à participà u issu Liet. L’artista rusinca vince cù 119 punti davanti à i Germani di Yourdaughters (gruppu di l’Holstein) è a so canzona « Hudsult ». In terza pusizione « O Teu caminar », canzona in Galicianu cantata da Carolina Rubinosa, un’artista spagnola. Di fattu, cinque nantu à dodeci membri di a ghjuria anu piazzatu à Doria à u capu di a so classifica. U a vittoria logica. « Sò assai cummossa d’issa vittoria, spiega l’artista, hè dedicata à u populu corsu sanu. Ùn hè solu a vittoria d’una canzona ma dinò d’una lingua, d’un populu... Marca una tappa impurtante ind’u mo percorsu è permette, à tempu, di mette in vale a nostra lingua, i nostri canti è i nostri artisti. Masimu cù tuttu ciò chì si passa oghje in Corsica. À dilla franca, ùn hè statu faciule, pensu, pè a ghjuria di fà a so scelta cù musiche diverse trà u rap, u rock, u folk, u tradiziunale, u religiosu, a musica eletronica. Ci hè statu u colpu di core.»
Una dimensione pulitica
In issa manifestazione, Doria Ousset vede dinò una dimensione pulitica. « Forse micca per tutti, aghjusta l’artista, ma quantunque, hè d’una certa manera, una ricunniscenza di a nostra lingua in Auropa mentre ch’in Francia, simu à l’addisperu. Aldilà d’un cuncorsu musicale, fù u cuncorsu di e lingue minuritarie è à issu puntu quì, avemu pussutu parlà tutti i participanti, di i nostri guai. Ùn avemu micca cantatu tutti cù un messaghju puliticu cum’è mè ma avemu tutti listessi prublema... »
A vittoria di Doria Ousset cù a so canzona « Roma » face di a Corsica, u secondu participante, cù a Lapunia, à vince duie volte u Liet Internaziunale dapoi ch’ellu esiste. Cù issa vittoria, l’artista rusinca s’apre d’altre porte. « Hè a ricunniscenza da a mo manera di cantà, di a mo musica ch’eu face una musica particulare quì in Corsica, sopratuttu per una donna. »
Iss’estate, Doria è i so musicante seranu in Corti, Cervioni, Pigna, Carghjese o Pruprià. Ma a squadra cerca à pruducesi aldilà di l’Isula. À u stranieru. A seguita logica, d’una certa manera, d’un’artista di qualità è d’una musica, forse una di e sole ind’è noi, à pudè fà un mischiu trà u cantu tradiziunale, u rock è u cantu corsu...Un’alchimia « nustrale ».
F.P.
L’artista insulana hà vintu, u tredeci di maghju scorsu, l’edizione 2022 di u Liet Internaziunale chì era urganizata in Tonder (Danemarcu).Una vittoria chì quattordeci anni dopu à quella di Ghjacumu Culioli, face a prumuzione di a lingua è a cultura corsa...
A Corsica hà vintu u Liet Internaziunale per a seconda volta dopu à a vittoria di Ghjacumu Culioli cù « Hosanna » quattordeci anni fà. Sta volta, ghjè Doria Ousset, artista corsa assai rinumata chì s’hè imposta in u Nordu di l’Auropa (Tonder, cità di u Danemarcu) cù « Roma ». Scritta da Paulu Turchi Duriani, issa canzona ci conta a storia dulurosa di a cumunità corsa in a cità taliana à u diciottesimu seculu. L’acconci musicali, chì mischianu tradiziunale è versi più muderni bulicati cù a voce linda di Doria, anu cunvitu a ghjuria.
U colpu di core di a ghjuria
À l’iniziu, eranu tredeci ghjunti da paesi o rughjoni induve ci hè una lingua minuritaria (cuncettu di a manifestazione), à participà u issu Liet. L’artista rusinca vince cù 119 punti davanti à i Germani di Yourdaughters (gruppu di l’Holstein) è a so canzona « Hudsult ». In terza pusizione « O Teu caminar », canzona in Galicianu cantata da Carolina Rubinosa, un’artista spagnola. Di fattu, cinque nantu à dodeci membri di a ghjuria anu piazzatu à Doria à u capu di a so classifica. U a vittoria logica. « Sò assai cummossa d’issa vittoria, spiega l’artista, hè dedicata à u populu corsu sanu. Ùn hè solu a vittoria d’una canzona ma dinò d’una lingua, d’un populu... Marca una tappa impurtante ind’u mo percorsu è permette, à tempu, di mette in vale a nostra lingua, i nostri canti è i nostri artisti. Masimu cù tuttu ciò chì si passa oghje in Corsica. À dilla franca, ùn hè statu faciule, pensu, pè a ghjuria di fà a so scelta cù musiche diverse trà u rap, u rock, u folk, u tradiziunale, u religiosu, a musica eletronica. Ci hè statu u colpu di core.»
Una dimensione pulitica
In issa manifestazione, Doria Ousset vede dinò una dimensione pulitica. « Forse micca per tutti, aghjusta l’artista, ma quantunque, hè d’una certa manera, una ricunniscenza di a nostra lingua in Auropa mentre ch’in Francia, simu à l’addisperu. Aldilà d’un cuncorsu musicale, fù u cuncorsu di e lingue minuritarie è à issu puntu quì, avemu pussutu parlà tutti i participanti, di i nostri guai. Ùn avemu micca cantatu tutti cù un messaghju puliticu cum’è mè ma avemu tutti listessi prublema... »
A vittoria di Doria Ousset cù a so canzona « Roma » face di a Corsica, u secondu participante, cù a Lapunia, à vince duie volte u Liet Internaziunale dapoi ch’ellu esiste. Cù issa vittoria, l’artista rusinca s’apre d’altre porte. « Hè a ricunniscenza da a mo manera di cantà, di a mo musica ch’eu face una musica particulare quì in Corsica, sopratuttu per una donna. »
Iss’estate, Doria è i so musicante seranu in Corti, Cervioni, Pigna, Carghjese o Pruprià. Ma a squadra cerca à pruducesi aldilà di l’Isula. À u stranieru. A seguita logica, d’una certa manera, d’un’artista di qualità è d’una musica, forse una di e sole ind’è noi, à pudè fà un mischiu trà u cantu tradiziunale, u rock è u cantu corsu...Un’alchimia « nustrale ».
F.P.
