André Marcangeli trenta cinque anni à u serviziu di u pugilatu
Anzianu dirigente di pugilatu
André Marcangeli trenta cinque anni à u serviziu di u pugilatu
Anzianu dirigente di pugilatu durante più di vinti anni, Dédé Marcangeli hà fattu a scelta di rientre in casa soia in Aiacciu guasgi deci anni fà per compie u so percorsu à u BCA. Una vita dedicata à a so seconda passione dopu à a musica. È un percorsu unuratu a settimana scorsa da una medaglia d’oru di a Federazione Francese di Pugilatu…
« Un omu senza passione hè quant’è un rè senza sughjetti », eccu l’infrasata d’un pruverbiu chì puderia carraterizà u più André Marcangeli. Un omu passiunatu di musica, entrutu, un ghjornu di a so zitellina in u quartieru di San Ghjuvà in u mondu di u pugilatu. « Ci era una spezia di cabana in legnu, spiega l’Aiccinu di ceppu pastricciolese, ci era una sala gestita da Antone Filippu è Jo Tarrassenko. Hè quì ch’aghju scupertu a disciplina. »
In u 1986, Dédé parte à a fruntiera suizzera per una carriera di musicante (canta è sona di ghitarra). Hè l’occasione di scopre, à tempu, e sale di pugilatu. « Aghju fattu u sparring, aghjusta u dirigente, è mi so presu di passione per issa disciplina. »
Titulariu d’un DEJEPS
Una passione chì u porta, qualchì tempu dopu, à francà u passu è un diploma d’instruttore federale, diversi esamini è principià un percorsu d’addestratore in Gaillard (1991) à u Ring Olympique. « In qualchì annu, aghju furmatu atleti prufessiunali cum’è Jonathan Nacto è Laurent Perret ch’anu fattu parte di a squadra di Francia. »
In tuttu, André Marcangeli riesce à furmà 16 atleti ch’anu da participà à campiunati è cuppe di Francia o criterium. In u 2000, decide di passà u so DEJEPS è parte dui anni in Parrighji sempre à furmà i ghjovani. « U scopu era di furmà li è fà ne passà certi da u statutu amatore à u statutu prufessiunale. » In fine, u furmatore travaglia intornu à a squadra di Francia di i ghjovani (squadra regiunale è detezzione) cù ghjovani di i Creps di Mâcon et di Voiron. Una passione di più di vinti anni bulicata cù a musica, induve ellu t’hà, ci vole à ricunnosce, un certu talente.
In u 2013, dopu à tamantu percorsu, decide di rientre in casa soia. « Aghju vulsutu vultà ind’è mè. Cunnisciu à Petru Paoli, capimachja di u BCA, hè u me paisanu. M’ hà dumandatu di dà una manu, aghju accettatu vulinteru... »
Dapoi nove anni, s’impegna cù a squadra. « Tuttu u mondu porta a so petra, aghju vulsutu sparte a me sperienza è mettela à u serviziu di u club. »
Sabbatu scorsu, à u Rossini è à l’occasione di a reunione di u Ring Aiaccinu, u dirigente hè statu unuratu da a Federazione Francese. Jean-Michel Simon, presidente di u cumitatu regiunale l’hà rimessu a medaglia d’oru di a Federazione per curunà issi trentacinque anni à u serviziu di l’atleti. « Sò assai cummossu d’issa ricunniscenza ma aldilà, ghjè u sport ch’ellu ci vole à mette in vale. Tengu à ringrazià à tutti quelli chì m’anu sustenutu è masimu Paul Leonetti, presidente du BCA, Petru Paoli, u me paisanu u capimachja di a squadra, u so cumpagnu Seb Poilblanc è dinò Alexandre Julien o José Mela. »
À settantanni passati, André Marcangeli ùn conta micca arrestà si quì. Segnu ch’ellu hè sempre prontu à tramandà.
F.P.
