<< U finici >>, a dimensione umana è spirituale di Ghjuvan Carlu Papi
Nouvel Album di Ghjuvan Carlu Papi
« U finici », a dimensione umana è spirituale di Ghjuvan Carlu Papi
Dopu à « Essenziali » è « D’umanu » , u famosu artistu isulanu hà zifratu u so terzu dischettu « u Finici », esciutu u trè di nuvembre scorsu.
Rinasce sè stessu è, à tempu, aiutà à fà rinasce un mondu novu, più umanu, eccu a demarchja di Ghjuvan Carlu Papi quand’ellu t’hà l’idea, qualchì annu fà, di travaglià nantu à un dischettu novu. Un percorsu chì hè, d’una certa manera, a seguita di i dui primi « Essenziali » è « D’umanu » è induve l’artistu solca a so manera d’esse, u so campà cù una dimensione umana a più larga pussibile. Hè cusì chellu hè natu u prughjettu « Finici ».
Una demarchja intruspettiva
« A simbulica hè assai impurtanti, spiega u cantadore, issu dischettu hè, à tempu, u fruttu di a me vita, quidda tramandata da i mei in a me zitiddina. Una spezia di dimarchja intruspettiva. Eppo ci hè dinò un sguardu nantu à à sucità d’oghji... »
Per concepisce « Finici », Ghjuvan Carlu Papi s’hè dinò arrimbatu nantu à a perioda di a crisa sanitaria. « Un tempu abbastanza scuru, aghjusta u Rucchisgianu, ma dinò una presa di cuscenza. Avemi vistu chè i rapporti erani spariti. Nè cumunicazioni, nè scambii, una sucetà priva, d’una certa manera, di a so essenza... »
Issa demarchja permette à l’artistu di mettesi à u travagliu, d’andà à circà in i so ricordi è a so memoria, u « suchju » è l’inspirazione necessarii per fà nasce issu dischettu. In dui anni, « Finici » hè prontu. Si sente a grinfia di u cantadore cù una maturità musicale è intelletuale. Di fattu, « Finici » pone una reflessione nantu à a sucetà d’oghje, l’evoluzione di a Corsica, a leia trà eri, oghje è dumane. Si truverà, à tempu, un’altra dimensione, più spirituale quessa quì, è sulcata d’altronde dapoi dece anni da l’artistu in e so cumpusizione.
In quattordeci canzone, Ghjuvan Carlu Papi trattà da tutti issi sughjetti chì ponenu interrugazione maiò. « Finici » hè un travaddu cullittivu, ripiglia l’artistu, come sempri, aghju avutu a furtuna d’essa accumpagnatu di a me maravigliosa squadra par a so realisazioni : Greg Gambarelli, Don Matteu Santini, Ghjuvan Federicu Terrazzoni, Alanu Di Megliu, Ghjuvan Petru Marcellesi. Senza sminticà tutti i musicanti è quiddi ch’ani participatu à a cuncipitura d’issu dischettu...»
À u spaziu culturale « La Ruche » issu venneri
L’artistu hà scrittu è cumpostu a maiò parte di i tituli. Ghjuvan Federicu Terrazzoni (« Finici »), Alanu Di Meglio (« Di novu »), Don Matteu Santini (« Mi saria piaciuta ») mettenu a so grinfia. Ghjuvan Petru Marcellesi zifra a musica di « Dulci Rivuluzioni » ma particularità, Ghjuvan Carlu Papi face dinò l’adattazione di Barbara « Di quandu ai da vultà » è Ze Amaro « Cara mea ». Truvemu, à tempu, à « Stella », canzona scritta è cumposta l’annu scorsu contru à e viulenze fatte à e donne. In fine, a so figliola Lisa Maria hà scrittu e parolle di « Ti vulia dì... »
L’artistu hà da fà, à pocu à pocu, a prumuzione di u so dischettu novu. Cusì, serà cù i so musicanti, à u spaziu culturale « La Ruche » issu venneri. Nanzu di cuntinuà a so strada. À u listessu tempu, Ghjuvan Carlu Papi travaglia cù a squadra di « Mezu mezu », induve s’hè impegnatu dapoi u principiu, nantu à un cuncertu maiò l’annu chì vene à l’Accor Arena (capacità di 40000 spettatori, sala a più maiò d’Auropa)...I prughjetti ùn mancanu micca per un artistu chì cerca sempre à chjarisce di u so talente, u cutidianu di a ghjente…
Ph.P.
Dopu à « Essenziali » è « D’umanu » , u famosu artistu isulanu hà zifratu u so terzu dischettu « u Finici », esciutu u trè di nuvembre scorsu.
Rinasce sè stessu è, à tempu, aiutà à fà rinasce un mondu novu, più umanu, eccu a demarchja di Ghjuvan Carlu Papi quand’ellu t’hà l’idea, qualchì annu fà, di travaglià nantu à un dischettu novu. Un percorsu chì hè, d’una certa manera, a seguita di i dui primi « Essenziali » è « D’umanu » è induve l’artistu solca a so manera d’esse, u so campà cù una dimensione umana a più larga pussibile. Hè cusì chellu hè natu u prughjettu « Finici ».
Una demarchja intruspettiva
« A simbulica hè assai impurtanti, spiega u cantadore, issu dischettu hè, à tempu, u fruttu di a me vita, quidda tramandata da i mei in a me zitiddina. Una spezia di dimarchja intruspettiva. Eppo ci hè dinò un sguardu nantu à à sucità d’oghji... »
Per concepisce « Finici », Ghjuvan Carlu Papi s’hè dinò arrimbatu nantu à a perioda di a crisa sanitaria. « Un tempu abbastanza scuru, aghjusta u Rucchisgianu, ma dinò una presa di cuscenza. Avemi vistu chè i rapporti erani spariti. Nè cumunicazioni, nè scambii, una sucetà priva, d’una certa manera, di a so essenza... »
Issa demarchja permette à l’artistu di mettesi à u travagliu, d’andà à circà in i so ricordi è a so memoria, u « suchju » è l’inspirazione necessarii per fà nasce issu dischettu. In dui anni, « Finici » hè prontu. Si sente a grinfia di u cantadore cù una maturità musicale è intelletuale. Di fattu, « Finici » pone una reflessione nantu à a sucetà d’oghje, l’evoluzione di a Corsica, a leia trà eri, oghje è dumane. Si truverà, à tempu, un’altra dimensione, più spirituale quessa quì, è sulcata d’altronde dapoi dece anni da l’artistu in e so cumpusizione.
In quattordeci canzone, Ghjuvan Carlu Papi trattà da tutti issi sughjetti chì ponenu interrugazione maiò. « Finici » hè un travaddu cullittivu, ripiglia l’artistu, come sempri, aghju avutu a furtuna d’essa accumpagnatu di a me maravigliosa squadra par a so realisazioni : Greg Gambarelli, Don Matteu Santini, Ghjuvan Federicu Terrazzoni, Alanu Di Megliu, Ghjuvan Petru Marcellesi. Senza sminticà tutti i musicanti è quiddi ch’ani participatu à a cuncipitura d’issu dischettu...»
À u spaziu culturale « La Ruche » issu venneri
L’artistu hà scrittu è cumpostu a maiò parte di i tituli. Ghjuvan Federicu Terrazzoni (« Finici »), Alanu Di Meglio (« Di novu »), Don Matteu Santini (« Mi saria piaciuta ») mettenu a so grinfia. Ghjuvan Petru Marcellesi zifra a musica di « Dulci Rivuluzioni » ma particularità, Ghjuvan Carlu Papi face dinò l’adattazione di Barbara « Di quandu ai da vultà » è Ze Amaro « Cara mea ». Truvemu, à tempu, à « Stella », canzona scritta è cumposta l’annu scorsu contru à e viulenze fatte à e donne. In fine, a so figliola Lisa Maria hà scrittu e parolle di « Ti vulia dì... »
L’artistu hà da fà, à pocu à pocu, a prumuzione di u so dischettu novu. Cusì, serà cù i so musicanti, à u spaziu culturale « La Ruche » issu venneri. Nanzu di cuntinuà a so strada. À u listessu tempu, Ghjuvan Carlu Papi travaglia cù a squadra di « Mezu mezu », induve s’hè impegnatu dapoi u principiu, nantu à un cuncertu maiò l’annu chì vene à l’Accor Arena (capacità di 40000 spettatori, sala a più maiò d’Auropa)...I prughjetti ùn mancanu micca per un artistu chì cerca sempre à chjarisce di u so talente, u cutidianu di a ghjente…
Ph.P.
