Fantasimati, i conti fantastichi à l'usu nustrale
Natu d'un ' idea di Micheli Solinas
.Fantasimati, i conti fantastichi à l’usu nustrale
Natu d’un’idea di Micheli Solinas, issu cuncettu novu si sviluppu intornu à l’adattazione in « podcast » di conti corsi fantastichi. Un prughjettu in lingua corsa chì sbuccherà in ottobre di u 2023…
U mondu fantasticu in generale, ch’ellu sia in corsu, francese o inglese, pocu impreme l’autore, hè qualcosa chì hè sempre piaciutu à Micheli Solinas, prufessore di corsu, sunadore di viulinu è cantadore monda cunnisciutu (Dopu Cena, Contraversu…). Cunniscimu, d’altronde, a so passione per a seria di i Marvel. Logicu, di vedelu tandu, cuncepisce un prughjettu novu intornu à l’universu fantasticu…
« Tuttu hè partutu da un bloggu di Marcu Biancarelli, nantu à u libru « Tarrori è fantasia, cù parechji autori corsi, spiega l’insegnante, eppo, in a cuntinuità, aghju letu un libru di Soj Chalendon « Mon traître », chì cuntava a storia d’un lutiaghju parrighjinu chì si ne và à scopra l’Irlanda è i so viulini...Aghju cercatu à sfruttà tuttu què è sò cascatu nantu à 10 episodii d’issu libru cuntattu è ghjucatu c’una musica irlandesi nantu à France Culture. M’hà datu l’idea di travaddà intornu à un prughjettu corsu. »
Un prughjettu purtatu da Ausha
Arrimbatu nantu l’idea di serve l’usu di a lingua cù l’uralità, Micheli Solinas hà cercatu à travaglià una nuvella di Petru Larenzu Santelli, « U Principellu », una fola appena strana, publicata nantu à u famosu libru « Tarrori è fantasia ». « Aghju travaddatu issu testu cù effetti di sonu, ripiglia u capimachja di u prughjettu, ma dopu, mi tuccava à accuncià d’altri parsoni. Cusì,Dumè Tomasi, cumpagnu di strada cù Contraversu, è Diana Egault, prufessori di corsi, participeghjani dinò à issu prughjettu. »
100 % in lingua corsa
Dumè Tomasi è direttore artisticu, Micheli Solinas è Diana Egault, contanu a sturietta. Ma l’idea hè d’andà ancu più luntanu. Hè in issu sensu chè u prughjettu hè purtatu da « Ausha », una piattaforma specializata per accoglie podcast. L’idea hè stata principiata dui mesi fà è s’hà da sviluppà in giru à un finanziamentu participativu. « A diffusioni serà libara par tutti i radio s’eddu ci hè un finanzamentu. Hè quantunqua un prughjettu 100 % in lingua corsa... »
S’è tuttu si passa bè, Fantasimati, un prughjettu chì si scrive à longu andà, serà prontu d’ottobre prussimu cù l’idea di sparghelu. Di fattu, una chjave USB serà data à tutti l’insegnanti di e classe di terza è di i licei, una manera d’allargà l’idea è di permette à sculari di travaglià à nantu. « Ulule » hè, in fine, un situ di finanzamentu participativu...
Ver di una stagione duie
Prumove a lingua corsa passendu per i podcast, eccu a nova scumessa di Micheli Solinas. « Saria forsa l’arnesi di dumani chì pudaria ancu rimpiazzà a radiu, cù un costu minori... »
L’insegnante travaglia, à tempu, cù Tapnoc un associu chì cerca à produce podcast. L’autore hà dighjà realizatu emissione in telecarimente di regalu per « dà a cultura à u populu ». Iss’associu pruducia podcast. Hè par quissa chì l’avemi cuntattatu. »
Micheli Solinas hà registratu à Bernardu Pazzoni nantu à i sunadori di viulinu di parechji lochi di l’isula (Cruzzini, Boziu, Ghjunsani, Fium’Orbu), cù ogni volta, pezzi strumentali. Una manera di tramandà un sapè fà musicale chì sparisce à pocu à pocu.
Aspettendu, Fantasimati face a so strada. È l’autore travaglia dighjà nantu à una stagione duie…
Ph.P.
