Sapè Fà : Usteria << Le Cabanon >> Trà mare è muntagne
Creata in u 2009 da Nadine Micheli è Loïc Terrier, pescadore, iss’usteria prupone una carta cuncepita à partesi di prudutti di u mare è qualchì carne nustrale accunciata cù licumi bio…
Usteria « Le Cabanon », in Aiacci
Trà mare è muntagne
Creata in u 2009 da Nadine Micheli è Loïc Terrier, pescadore, iss’usteria prupone una carta cuncepita à partesi di prudutti di u mare è qualchì carne nustrale accunciata cù licumi bio…
Semu à a fine di a famosa stretta Bonaparte in Aiacciu. U carrughju drittu cum’elli dicenu l’anziani. Hè quì chè Nadine è Loïc anu decisu di creà, qualchì tempu fà, l’usteria « Le Cabanon ». Un locu appena chjucu, ma una cucina aperta d’induve l’odori di i prudutti chì cocenu in e paghjole, si sente. Fora, una terrazza chì pò accoglie solu una vintena di persona. Averemu subbitu capitu chè u locu hè particulare. Ùn si tratta micca solu di u cumerciu ma piuttostu d’un ambiu. Un ambiu gustativu. « Issu locu, spiega Nadine, ci curresponde, l’avemu fattu cù Loïc, u me spusatu, à modu nostru. »
Da u mare à u piattu
Anziana cumerciante, (i famosi camiò di pizza Nadine à i Salini), Nadine Micheli hà abandunatu tuttu dopu à un’allergia à a farina. Ma, hà sempre avutu issa voglia di creà un cuncettu d’usteria « nustrale », « cù i nostri frutti è licumi piantati sopra piazza, aghjusta a cucinara, si face avà, à pocu à pocu, ma prima, avemu avutu a pussibilità di ripiglià issu lucale. »
À a fine di l’anni 2000, u coppiu decide di lampà si. Nadine tenerà qualchì tempu unu di i so camiò ma diventa, lestru difficiule di mantene e duie attività. Vende a prima strutturz per cuncentrà si nantu à « Le Cabanon ». Pescadore ma pocu cumerciante per ciò chì tocca à vende i so prudutti, Loïc prupone dunque a so pesca di u ghjornu, cucinata sopra piazza da Nadine cù sosule nustrale. « Si dipende di e so surtite. A mane, ùn la sò ancu ciò ch’eu facciu a meziornu è a sera. »
Issu ghjornu quì, Nadine appronta qualchì gritta, una sosula à l’Aiaccina. Accantu, cavulifiori è cum’è dolce, un ghjacciu à a banana, tuttu fattu da per ella di sicuru. Per a carta, Nadine travaglia cù a so tavulella secondu à i prudutti di u ghjornu. A pesca, sicura (ligusta, cappone, urata, gambari, zeppia, lucapante, zini i stagione…) è dapoi qualchì tempu, a carne nustrale (vitellu, agnellu, salciccia…). « L’impurtante, hè u pruduttu. Hè a basa di tuttu è permette di passà da u mare à u piattu. Issu cuncettu piace assai à la ghjente. È ci piace dinò ch’è noi pudemu avè un cuntattu strettu cun ella. »
Ver di l’agricultura bio
Loïc pò passà, certe volte, dece ore in mare. « Sò pescadore dapoi u 1992. Una vucazione famigliale chè u me arci missiavu era pescadore. Aghju ripigliatu dopu à una rumpitura in issa tradizione quì, chè missiavu è babbu ùn avianu micca fattu issa scelta quì. »
Passiunatu da a pesca, Loïc hà trovu cù iss’idea quì, a so strada. « Sò vicinu à u me locu di travagliu... »
Ma u coppiu ùn si vole micca arrestà quì. T’hà un terrenu à i Milelli induve cummencia un’attività nova : l’agricultura. Nadine hà ottenutu u statutu di direttrice agricula è si cummencia à piantà è avè, à tempu, d’altri prughjetti. « Table d’hôte cù prudutti nustrali è u nostru sapè fà, aghjusta Nadine, ma si cuntineghja « Le Cabanon », forse durante solu a staghjone. »
Ph.P.
Usteria Le Cabanon
4, boulevard Danièle Casanova, 20000 Aiacciu
Tel : 04-95-22-55-90
