Moca music : da l’animazione à l’ambiu festivu
Creatu dui anni fà da Simon Paulu Ferradi è qualchì amicu, issu gruppu face di l’animazione in corsu, francese, inghlese o talianu a so priurità.
Moca music : da l’animazione à l’ambiu festivu
Creatu dui anni fà da Simon Paulu Ferradi è qualchì amicu, issu gruppu face di l’animazione in corsu, francese, inghlese o talianu a so priurità.
Semu in u 2021. Simon Paulu Ferrandi, unu di i capimachja di u gruppu Cuscenza, face, cù qualchì amicu, animazione in alberghi, usterie caffè… Comu, d’altronde, si face d’estatina da per tuttu inde l’isula. « Avemi cumminciatu cusì, spiega u ghjuvanottu, erami dui o trè à participà di manera naturali, senza circà à andà aldilà. »
Primi passi à u « Son des guitares »
Cusì, è dopu à qualchì tempu, vene, un ghjornu, l’idea d’allargà a squadra. Ma sopratuttu di scambià d’andatura. Una squadra chì face i so primi passi à u « Son des guitares » in Aiacciu, intornu à a varietà internaziunale. À pocu à pocu, a struttura piglia un altru versu. Affaccanu ghjente cum’è Julien Petit (tercanu à a ghitarra solò è elettricza)), Thomas Bouchet (percussione), Battì Cappai (ghitarra bassa) o Thomas Pellegrini (ghitarra è cantu) è d’altri…
« L’idea, ripiglia Simon Paulu Ferrandi, era di fà qualcosa di più seriu cù un veru travagliu vucali è strumentali. »
Strada facendu, a struttura piglia u nome di Moca, « Music of Corsica Anima » è cerca in tantu chè spaziu, un ambiu festivu : battesimi, matrimonii, lochi festivi da per tuttu in Corsica ma à spessu in Aiacciu. « Avemi fattu u « Son des guitares ma dinò u Lamparo o l’Entracte... »
Un primu dischettu nantu à Deezer
Un travagliu chì hà, subbitu, purtatu i so frutti cù un materiale prufessiunale di qualità chì permette di repete bè. Una volta a settimana, a squadra si ritrova à una di e sale di studiu 20, in Aiacciu per più di duie ore di travagliu. « Travaddemu in contracanti, i voci, l’acconci musicali di manera à essa u più precisu pussivule. »
Cumpostu di canzone taliane, inghlese, francese o ancu certe volte spagnole, u repertoriu di u gruppu hè abbastanza largu (200 canzone à pocu pressu). Sò pigliate sia tale quale, sia accunciate à modu soiu (di più ritimu…). Di ghjugnu, Moca hà esciutu un dischettu live, fruttu d’un cuncertu datu in Bastia. Dece canzone di u repertoriu francese cum’è « La groupie du pianiste » (Michel Berger), « Les murs de poussière », « Encore et encore » (Cabrel), « Toi et moi » (Guilaume Grand), « J’te le dis quand même » (Bruel), « Aimer jusqu’à l’impossible » (Tina Arena), « Les yeux révolver » (Lavoine), « Mourir demain » (Natascha Saint-Pierre), « Baila Morena » (Zucchero). Cù assai ritimu è acconci musicale « pop folk » è qualchì frasa di Julien Petit, l’inseme hè d’una grande qualità. U gruppu gira d’estatina (Aiacciu, Bastia, Ulmetu…). A seguita ? «Circhemi sopratuttu à piddà u piacè. Travaddemi per accuncià u più di canzoni pussibili è stemi pronti s’è qualchissia ci voli accoglia. »
Una squadra da seguità…
Ph.P.
MOCA Live
-Simon Paulu Ferrandi (ghitarra è cantu)
-Julien Petit (ghitarra elettrica)
-Thomas Pellegrini (ghitarra è cantu)
-Battì Cappai (ghitarra bassa)
-Thomas Bouchet (batteria, cajon, percussione)
-Dumè Giarizzo (ghitarra è cantu)
