Sapè Fà : Ghjuvan Dumenicu Le Meur, l'amore di a rillugeria

Ghjuvan Dumenicu Le Meur, l’amore di a rillugeria

Stallatu in a Sulinzara, induve ellu t’hà e so radiche, Ghjuvan Dumenicu Le Meur, cuncepisce rillogi di a più alta qualità. A seguita logica d’un percorsu natu da zitellu.


Ci sò ghjente chì, da zitellu, sanu ciò ch’ellu volenu fà più tardi. È mettenu tutti i mezi per ghjunghjeci. Cusì, s’hè sulcatu u percorsu di Ghjuvan Dumenicu Le Meur, rillogiaiu in a Sulinzara. Un percorsu principiatu à l’età di...ondeci anni. « Di fattu, spiega l’artisgianu, issa passione hè ghjunta un ghjornu ch’eu fighjulava una Rolex. Senza tene contu di so u prezzu, ghjè u mecanisimu senza batteria ch’eu truvava strasordiariu. Da issu ghjornu quì, a sappiu ciò ch’eu vulia fà : rillogiaiu. »


Sette anni di furmazione in Neuchâtel

Cusì, è dopu à a so scularità in u circondu, Ghjuvan Dumenicu dicide di parte à studià in Svizzera, ind’a famosa scola « Haute Ecole ARC », in Neuchâtel. Prima in ingenieria « Micromecchaniche rillugeriu » nanz’à una urientazione nova sbuccata in un Bachelor è un Master in 5 anni.« L’occasione, aghjusta l’omu, di pudè studià intornu à a cunservazione è a restaurazione di u patrimoniu scentificu, tecnicu è rillugeriu. »
Dopu avè ottenutu dui diplomi chì valutechjanu a so sperienza è u so travagliu, l’artisgianu si ne và in Besançon à sfruttà a so spertisa cù una nova furmazione prufessiunale.Ghjunghjemu, dopu, i tempi di u Covid. Custrettu di stà ind’è ellu
mentre ch’un cuntrattu l’aspetta, Ghjuvan Dumè passa u so tempu à...cuncepisce un primu mudellu. « Aghju vulsutu creà un quadrantu pè u mo rillogiu ideale, fattu à modu meiu. L’aghju imaginatu, aghju fattu disegnu. Cusì, hè nata una prima pruduzzione di cronografiche... »

« Mustrà chè a rillogeria hà tutta a so piazza in Corsica »


U rillugiaiu cuncepisce ottanta rillogi chì partenu tutti in quattru è trè sette. Tandu, dicide d’investisce tuttu pè allargà u so travagliu, di stallà si ind’è ellu è di fabricà mudelli unichi è 100% uriginale. « Mi sò messu ind’ cuncipimentu d’elementi chì cumponenu u rillogiu : braccialetti, achi, scancelle, muvimenti, facciu a tinta di i quadranti, l'intagliu persunalizatu daretu à l'ariloghji, dopu facciu l'assemblea, l'aghjustamentu di u muvimentu, è in fine a prova di precizione e di resistenza à l'acqua. A pussibilità di fà tutte st'operazione direttamente in lu mo attellu mi permette di prupone creazione uniche per passiunati d'urulegeria o simplicciamente per e parsone chì cercanu qualcosa di speciale per rigalà o trasmette. » U prughjettu di i rillogi Le Meur hè in marchja cù l’ambizione di creà l’ugettu à 100 % in Corsica. Un rillogiu imaginatu, pensatu è cumpostu quì. « L’occasione, per mè, di mette in vale u mo sapè fà,masimu ind’ un settore assai esigente. È di mustrà, à tempu, chè a rillugeria hà tutta a so piazza quì, in Corsica. »

Una rillogeria di a qualità a più alta, arrimbata nantu à tecniche di

Svizzera, referenza mundiale. Dapoi a creazione di a so marce, sò nati dui mudelli : A Prima (cù u quadrantu pitturatu da a manu, ma ancu in Gnaccara è meteoricu) è a lucerna, un mudellu di ciuttà. «Per ciò chì tocca à u mudellu Ferrale, esciutu da a lucerna, Xavier Biancarelli parte in furesta à cercà l’elementi ch’anu da fà l’acciaghju spilliciulatu, dopu face un discu chi diventa u quadrante è Dumè Santoni, face u braccialettu in coghju cusgitu à a manu. L’idea, aldilà d’issu mudellu particulare, hè d’adunisce u sapè fà d’artisgiani per mette, ghjust’appuntu u sapè fà isulanu in vale.
Per ciò chì tocca à u prezzu, i rillogi vanu da 2500 (A Prima) à 4000 auri (Lucerna) è 7000 auri pè u mudellu Ferrale.
I rillogiu di Ghjuvan Dumè cummencianu à esse cunnisciuti in Corsica è altrò. Una manera di mustrà tuttu u sapè fà ch’è no t’avemu in Corsica. In quantu à l’artisgianu, d’altri mudelli anu da, forse, esce...


Ph.P.


Montres Le Meur,
Piazza di a vechja scola, 20145 Sari, Solenzara
Cuntattu : 07-87-24-83-88
Situ : www.montreslemeur.com