Sapè Fà : L’oru di Tassu : L’estru campagnolu d’Antone Tasso
Stallatu in Tassu, induve ellu hà e so radiche, Antone Tasso, 27 anni, hà fattu a scelta d’un modu di vita campagnolu. Dapoi trè anni, face cù Paulu, u so babbu, a farina castagnina…
L’oru di Tassu : L’estru campagnolu d’Antone Tasso
Stallatu in Tassu, induve ellu hà e so radiche, Antone Tasso, 27 anni, hà fattu a scelta d’un modu di vita campagnolu. Dapoi trè anni, face cù Paulu, u so babbu, a farina castagnina…
Ciuttatu da a so zitellina in u bagnu di a vita paisana, Antone Tasso hè statu allevatu à l’usu nustrale. « Par mè, spiega u ghjuvanottu di l’età di vintisetti anni, ùn ci mai statu amparera di nudda, sò cresciutu in paesi induva passaia tutti i mo vacanzi postu ch’è noi campaiami in Aiacciu. Ma a vita paisana s’hè imposta di manera naturali. »
À mezu à l’anziani
Cusì è dopu à un percorsu sculare in a Cità Imperiale, Antone face a scelta di travaglià in paese. « Cum’è l’aghju detta, aghjusta l’omu, eru sempri à mezu à l’anziani è i ghjovani di a me generazioni. In paesi, ùn si parlaia chè corsu è u parlemi sempri ancu avà cù i me amichi. Ma issu cuntattu ch’aghju avutu cù l’anziani m’hà permessu d’essa in leia cù a vita paisana di nanzu. Hè cusì ch’aghju fattu a me strada. »
Cusì, trè anni fà, Antone decide cù Paulu, u so babbu, di travaglià intornu à e castagne, è masimu a farina. Tandu nascerà à pocu à pocu, « L’oru di Tassu ». « Ci era un castagnetu abandunatu, l’avemi ripiddatu cù babbu. Ci hè vulsutu nanzu à tuttu à smachjà è puliscia. »
Un travagliu à l’usu anticu
À mezu à i cunsigli di l’anziani (frà elli u so ziu), Antone riesce issu percorsu novu. Ma sempre cù a particularità d’esse arradicatu à a vita paisana. « Ci hè qualcosa di a vita di nanzu chì hè statu mantenutu sin’à d’avà : A sulidarità, l’aiutu...Semi deci pruduttori di farina castagnina in paesi è ognunu aiuta l’altru. Avemi tenutu l’usi di l’anziani. Ci hè u mulinu è u forru par tuttu u mondu. U solu arnesu « mudernu » hè una pistaghjola chì ci parmetta di pistighjà trè tonne di castagni in quattru ori. »
Dapoi trè anni, Antone è Paulu travaglianu à l’usu anticu ind’un terrenu di dui ettari da intratene è nittà nanzu di pone e rete è di racoglie ind’una ghjurnata sola. « Avemi l’aiutu d’altri paisani. Questu annu, avemi da racoglie u trè di nuvembre. »
Una volta racolte, e castagne sò purtate in u rataghju famigliale vicinu à a casa. Seccate durante trè settimane, pistaghjate davanti à u rataghju, spizzicate nanzu di passà à u fornu. « Par trè chilò di castagni, avemi un chilò di farina. »
Da 350 chilò à una tonna
E castagne sò scaldate à u fornu (scopa è albitru) è dopu, macinate à u mulinu. « Tuttu issu travaddu si faci da sittembri à a fini di nuvembri. Dopu, si metta tuttu in sacchetti.»
A prima annata, Antone è Paulu anu fattu 350 chilò di farina. Sò passati, avà à una tonna. « Hè difficiuli di campà`solu d’iss’attività, ci tocca à diversificà la ma semi arradicati à a noscia tarra, a noscia cultura, i tradizioni si perdani. I nosci anziani campaiani cusì tuttu l’annu. Tocca à noi, ghjovani, d’intratena issa fiara ch’eddi ci ani lasciatu. »
Antone face sempre u passu è vene trà Aiacciu è Tassu. S’ellu campa dinò à l’usu mudernu, a vita paisana hè sculpita in u so core. Una manera di mantene, aldilà di a pulitica, ciò chì face l’estru corsu…
F.P.
L’oru di Tassu, 20134 Tassu
Pagina instagram : loru-di-tassu
Cuntattu : 06-32-66-29-26
