Marc Tesi unuratu in San Benedettu "Un égaré au Royaume de Dieu"

Marc Tesi unuratu in San Benedettu

Autore di l’opera puetica « Un égaré au Royaume de Dieu », Marc Tesi hà prisentatu u so rumanzu a settimana scorsa in San Benedettu induve U Cardinale Bustillo avia tenutu à celebrà a messa…


Scrittu quaranta anni fà da Marc Tesi, u rumanzu « Un égaré au Royaume de Dieu » hà cunniscitu un percorsu strasordinariu a settimana scorsa davanti à a ghjesgia di San Benedettu. « Hè a reedizzione d’un libru ch’aviu scrittu tempi fà, spiega Marc Tesi, u so autore è duttore à a retirata, è un percorsu, ci vole à dilla, appena stunante. Di fattu, unu di i me amichi, Alain Régnier, hà letu issu libru, ellu ch’ùn crede micca in Diu è m’hà dettu « aghju da fà disegni di Cristu è avemu da fà un libru d’arte cù u to scrittu liati à issi disegni. Prima di tuttu, vuliamu una ceremonia appena intima per prisentà issu travagliu. U paese di San Benedettu s’hè prupostu per accoglieci in a so piccula ghjesgia. Cum’é aviu un appuntamentu cù u Vescu ch’ùn era ancu Cardinale, l’aghju dumandatu d’avè l’accunsentu di u prete di a parochja per celebrà a messa. Ed ellu m’hà rispostu : « ghjunghjeraghu eiu ! »

Tutti l’associ di San Benedettu si sò impegnati à prò d’issa bella ghjurnata.


Una prosa puetica

Marc Tesi hà scrittu u so libru quand’ellu era studiente in medicina. « Ùn aviu micca u tempu di leghje, à l’epica altre affare chè qualcosa in leia cù a medicina, aghjusta l’autore, ma aviu cunniscitu, in u me percorsu, un prete Dumenicanu, u prete Serge Bonnet. È ghjè ellu chì mi dò, d’una certa manera, a passione è u gustu di a Teulugia. M’avia rigalatu u libru « Le temps et l’éternité ». Cumincendu à leghje issu libru, aghju vulsutu scrive « Un égaré au Royaume de Dieu », speziu di « dubitatio universalis de veritate ». Hè una prosa puetica è una testimunianza, à tempu, di a me fede. Sò un omu di scienza ma ùn ci vole micca à oppone scienza è fede. Ponu viaghjà inseme...»


« L’amore hè u mutore di a vita cristiana »

Ghjovi scorsu, a piccula cappella di San Bedenettu era bella chjuca per accoglie più di 150 persone ghjunte da u paese ma ancu d’altrò. Forse per cuntrastà duie siconde cù u Cardinale Bustillo. « Quandu sò statu numatu in Corsica, spiega quellu, aghju dettu ch’eru un omu di terrenu. Ci sò cumunità maiò in e cità, ci sò dinò picculi paesi cum’è quessu quì. Quand ‘ellu affacca u Vescu, u populu s’adunisce. Face parte di a me missione d’adunisce la ghjente è purtà la à celebrà, crede è campà ciò ch’aghu dettu durante l’omelia, dà è sparghe l’amore in giru à noi...Deve esse u mutore di a vita Cristiana... »

Dopu à a messa, tutti si aduniti in giru à un bichjeru di l’amicizia sempre intornu à issa tematica. L’occasione, per Etienne Ferrandi, u merre d’Alata, di dà u so parè : « U Cardinale hà sceltu issa piccula cappella per accoglie issa ceremonia. Mostra quì, tutte e so qualità, ellu chì hè sempre à fiancu à la ghjente. Pocu impreme l ‘opinione pulitiche, hè un ghjestu chì ci tocca assai masimu in issi mumentu duri ch’ è noi campemu in Corsica cum’è in u mondu sanu. E so parolle anu toccu à tuttu u mondu. »

Una celebrazione pertuta à l’iniziu da a scrittura d’un libru è chì hè andata aldilà di ciò chè omu sperava. Un mumentu di fede spertutu da tutta la ghjente…

F.P.