Stefanu Pinelli u primu dischettu

Stefanu Pinelli : « d’una isula à
l’altra »

Hè esciutu a settimana scorsa nantu à e piattaforme specializate, u primu dischettu di l’artistu Stefanu Pinelli. Quattordeci tituli sunati à a mandulina è un ponte musicale fattu da l’artistu trà a Corsica è l’Irlanda…


Stefanu Pinelli hè monda cunniscitu in l’universu di a musica corsa. Dapoi più di vinticinque anni, hà fattu a so strada inde gruppi cum’è « Dopu Cena », « Contraversu , « Zilimbrina », sunendu ogni volta di ghitarra, busucchì è mandulina. « Era zitellu quand’aghju avutu a mo prima mandulina rigalata da babbu, spiega l’artistu, ma era troppu difficiule di sunà. L’aghju messa da cantu. A musica tradiziunale ? Una lascita di me arci missiavu Martinu dettu « Martitinu » chì sunava di viulinu in paese di u Pighjolu. À dilla franca, ùn mi sò mai messu à issu strumentu quì ma e radiche sò sempre quì ! » Di fattu, Stefanu hà da stà parechji anni nanzu d’esse arradicatu à u so ceppu musicale maternu. Chè à l’iniziu, hè statu « viculatu » cum’è tanti, da Mark Knoppfler (Dire Straits), Eric Clapton the « King » è David Gilmour (Pink Floyd). « Ci n’hè statu tanti è tanti, aghjusta u musicante, aghju sempre avutu un gustu particulare per u pop rock è u blues. » Hè in tempi di i so studii, in Corti à u principiu di l’anni 2000 chè e « sirene nustrale » sò vultate. « E mo radiche paisane, a musica di mo arci missiavu è u riacquistu... »

A passione di a musica irlandese

Hè cusì chè Stefanu Pinelli aghjunghjerà u gruppu « Dopu cena » (musica tradiziunale) cù parechje veghje, cuncerti in Corsica. Hè quì dinò ch’ellu cerca à fà un mischiu di a musica corsa è quella di a so zitellina. Cù una passione particulare per a musica irlandese.

« Aghju un veru rapportu intimu cù l’Irlanda, m’hè sempre piaciuta issa terra è issa musica, masimu dopu avè seguitatu à Knoppfler dopu à a so partanza di u gruppu Dire Straits. Mi sò ancu messu à e creazione à u busucchì è a mandulina. »

Dopu à « Contraversu » (face sempre parte di a squadra), Stefanu Pinelli hà fattu a scelta di travaglià qualchì tempu fà, nantu à un dischettu dedicatu solu à a mandulina. « Un strumentu chì mi piace assai è ch’aghju ripigliatu cù i gruppi induve aghju sunatu è songu sempre. » Cusì hè nata l’idea di « D’un’isula à l’altra ». Un ponte musicale chì seria, d’una certa manera, u riassuntu di vinticinque anni di musica è à tempu, un mischiu di e so duie passione musicale. U dischettu, esciutu a settimana scorsa nantu à e piattaforme specializata, mette ghjust’à puntu, in vale, e duie musiche. Quattordeci tituli accunciati da ellu stessu è accumpagnati à a ghitarra, u busucchì o u viulinu da une pochi d’amichi : Micheli Solinas, Dumè Tomasi è Pasquale Joly « Un mischiu di pezzi tradiziunali corsi « cuntradanza di pedigrisgiu », s’è tù voli o Catalì », « Uliosa », irlandesi « Glasgow reel », « Maidrin Rua » è dinò qualchì creazione, « Stradella »... »

Un dischettu chì hà dumandatu quattru mesi di travagliu è una settimana di registramentu in i studiò « Ricordu ». Dopu à l’esciuta di dischettu, l’artistu hà da passà avà à a so prumuzione cù qualchì cuncertu in parechji paesi. L’occasione di sente un artistu di qualità.


F.P.