Festa di i Santi : Issu primu di nuvembre......
Trà fede religiosu è tyradizione antica
Festa di i Santi : trà fede religiosu è tradizione antica
Issu primu di nuvembre, i Corsi anu da, cum’in parechji paesi di u mondu cristianu, fiurisce e tombe, accende candele è festighjà i santi. Una tradizione religiosa chì adunisce a ghjente, omancu una volta à l’annu…
In Corsica, ci hè dui mumenti induve a populazione si ritrova intornu à usu tradiziunali : a caccia, chì permette di mantene a lingua è a tupunimia, è a festa di i Santi, chì adunisce, ogni primu di nuvembre, a ghjente in campu santu. Puderiamu aghjustà l’intarri, quand’elli cascanu.
Cusì, ùn ci bisognu, nè di cummercialisazione, nè di i media, per « cullà » in paese ogni primu di nuvembre chè tutti, chjuchi è anziani si ritrovanu inseme, omancu per una ghjurnata. Di sicuru, quelli chì sò dighjà sopra piazza o chì ch’ùn stanu troppu luntanu, vanu à nettà e tombe nanzu di fiuriscele è d’accende e candele (a notte di u 31). Hè l’occasione, à tempu, di fà un pranzu inseme è di sparte un mumentu in famiglia. Ma d’induve venerà issa tradizione ?
Radiche pagane ?
L’origine d’issa festa ghjunghjeria da u quartu seculu liata à i martiri. Ùn hè ch’à l’ottesimu seculu chè u Papa Grégoire decide di cunsacrà a cappella San Petru di Roma un primu di nuvembre dedichendu issu ghjornu à tutti i Santi. A so simbulica hè abbastanza forte, oghje dinò. Ma, à dilla franca, hè una creazione di a Ghjesgia ch’ùn hè micca scritta in a Bibbia. Cacciata in tempi di a Revuluzione, a festa hè stata ripigliata in u 1802 da Napuliò... Ma s’è no fighjulemu ancu nanzu, scuprimu radiche ancu più anziane. Celtiche è a festa di Samain, monda cunnisciuta, oghje, sottu à u nome d’Halloween, una spezia di Capu d’annu celticu.
Un rituale anticu
Di fattu, è secondu à issa tradizione pagana, i morti vultavanu issu ghjornu quì è ci vulia à lascià li qualcosa da manghjà. D’un altra manera, i paisani eranu custumati è lasciavanu i lumi spenti. Parechji usi, in Corsica, sò liati à issa notte quì. T’avemu l’usu di a bastella (centru Corsica, Dui Sorru), chì si facia, tempi fà chè per i morti è chì si pò truvà, oghje, tuttu l’annu, i sciacci sartinesi, u pane di i morti in u Taravu, in Alta Rocca, l’üga sicaia cù i frutti passi, specialità bunifazinca, a salviata (rughjone bastiacciu), i panioli di i Peri, a torta cù l’arba in Altiani. In certi lochi (Murzu per indettu), si sunavanu e campane è l’anziani amparavanu issu « rituale » à i più ghjovani. Di fatti, si ritrovanu isse tradizione di lascià à manghjà à i morti in d’altri paesi di u mondu cum’è l’America suttana, forse dinò in Irlanda induve a festa d’Halloween pigliò e so radiche nanzu di sparghjesi à i Stati Uniti.
Un altru puntu impurtante sulcatu dinò in a nostra tradizione, hè quellu di u dui di nuvembre, a festa di i morti, chè tuttu u mondu mischia cù u ghjorni di i Santi. Torna secondu à i celtichi, un terzu ghjornu esistia ma serà sparitu. Seria per cunvertisce i pagani à u Cristianisimu chè a Ghjesgia s’arrimbò forse nantu à issa tradizione. Semu luntanu, quì di a tradizione di a Santa Andria (u 30 di nuvembre) chì marca, di più u passaghju da l’estate à l’invernu.
Oghje, l’usi tradiziunali si perdenu à pocu à pocu. Ferma u fattu di pulisce i lochi, è di fiurisce e tombe. Aldilà d’un puntu solu religiosu, seria una marca di rispettu cù i nostri defunti. Un rapportu particulare cun elli. Per ciò chì tocca i crisantemi, a tradizione ghjunghjeria da Georges Clémenceau, chì dumandò dopu à a prima guerra, à tutti i Francesi di fiurisce e tombe di i suldati cascati à u campu d’onore. Un usu spertutu, dopu, à a data di u primu di nuvembre. Si pò dunque pinsà chè issu fiore quì hè statu cultivatu in Corsica, monda più tardi ch’in altrò.
F.P.
Photo : F.P
Issu primu di nuvembre, i Corsi anu da, cum’in parechji paesi di u mondu cristianu, fiurisce e tombe, accende candele è festighjà i santi. Una tradizione religiosa chì adunisce a ghjente, omancu una volta à l’annu…
In Corsica, ci hè dui mumenti induve a populazione si ritrova intornu à usu tradiziunali : a caccia, chì permette di mantene a lingua è a tupunimia, è a festa di i Santi, chì adunisce, ogni primu di nuvembre, a ghjente in campu santu. Puderiamu aghjustà l’intarri, quand’elli cascanu.
Cusì, ùn ci bisognu, nè di cummercialisazione, nè di i media, per « cullà » in paese ogni primu di nuvembre chè tutti, chjuchi è anziani si ritrovanu inseme, omancu per una ghjurnata. Di sicuru, quelli chì sò dighjà sopra piazza o chì ch’ùn stanu troppu luntanu, vanu à nettà e tombe nanzu di fiuriscele è d’accende e candele (a notte di u 31). Hè l’occasione, à tempu, di fà un pranzu inseme è di sparte un mumentu in famiglia. Ma d’induve venerà issa tradizione ?
Radiche pagane ?
L’origine d’issa festa ghjunghjeria da u quartu seculu liata à i martiri. Ùn hè ch’à l’ottesimu seculu chè u Papa Grégoire decide di cunsacrà a cappella San Petru di Roma un primu di nuvembre dedichendu issu ghjornu à tutti i Santi. A so simbulica hè abbastanza forte, oghje dinò. Ma, à dilla franca, hè una creazione di a Ghjesgia ch’ùn hè micca scritta in a Bibbia. Cacciata in tempi di a Revuluzione, a festa hè stata ripigliata in u 1802 da Napuliò... Ma s’è no fighjulemu ancu nanzu, scuprimu radiche ancu più anziane. Celtiche è a festa di Samain, monda cunnisciuta, oghje, sottu à u nome d’Halloween, una spezia di Capu d’annu celticu.
Un rituale anticu
Di fattu, è secondu à issa tradizione pagana, i morti vultavanu issu ghjornu quì è ci vulia à lascià li qualcosa da manghjà. D’un altra manera, i paisani eranu custumati è lasciavanu i lumi spenti. Parechji usi, in Corsica, sò liati à issa notte quì. T’avemu l’usu di a bastella (centru Corsica, Dui Sorru), chì si facia, tempi fà chè per i morti è chì si pò truvà, oghje, tuttu l’annu, i sciacci sartinesi, u pane di i morti in u Taravu, in Alta Rocca, l’üga sicaia cù i frutti passi, specialità bunifazinca, a salviata (rughjone bastiacciu), i panioli di i Peri, a torta cù l’arba in Altiani. In certi lochi (Murzu per indettu), si sunavanu e campane è l’anziani amparavanu issu « rituale » à i più ghjovani. Di fatti, si ritrovanu isse tradizione di lascià à manghjà à i morti in d’altri paesi di u mondu cum’è l’America suttana, forse dinò in Irlanda induve a festa d’Halloween pigliò e so radiche nanzu di sparghjesi à i Stati Uniti.
Un altru puntu impurtante sulcatu dinò in a nostra tradizione, hè quellu di u dui di nuvembre, a festa di i morti, chè tuttu u mondu mischia cù u ghjorni di i Santi. Torna secondu à i celtichi, un terzu ghjornu esistia ma serà sparitu. Seria per cunvertisce i pagani à u Cristianisimu chè a Ghjesgia s’arrimbò forse nantu à issa tradizione. Semu luntanu, quì di a tradizione di a Santa Andria (u 30 di nuvembre) chì marca, di più u passaghju da l’estate à l’invernu.
Oghje, l’usi tradiziunali si perdenu à pocu à pocu. Ferma u fattu di pulisce i lochi, è di fiurisce e tombe. Aldilà d’un puntu solu religiosu, seria una marca di rispettu cù i nostri defunti. Un rapportu particulare cun elli. Per ciò chì tocca i crisantemi, a tradizione ghjunghjeria da Georges Clémenceau, chì dumandò dopu à a prima guerra, à tutti i Francesi di fiurisce e tombe di i suldati cascati à u campu d’onore. Un usu spertutu, dopu, à a data di u primu di nuvembre. Si pò dunque pinsà chè issu fiore quì hè statu cultivatu in Corsica, monda più tardi ch’in altrò.
F.P.
Photo : F.P
