L'inchietudine di i cacciadori
Aperta dapoi u quindeci d'aostu, cum'é tutti l'anni, a caccia paca, ella dino, e cunsequenze di a crisa sanitaria.
L’inchietudine di i cacciadori
Aperta dapoi u quindeci d’aostu, cum’è tutti l’anni, a caccia paca, ella dinò, e cunsequenze di a crisa sanitaria. D’attestazione in derugazione, a pratica hè di più in più limitata, cum’è d’altronde, u numaru di cacciadori. Aldilà di campà issa passione isulana, ci sarianu dinò minaccie per ciò chì tocca à certe pupulazione cum’è i cignali, i culombi o i cunigliuli….
Quand’elli ripiglianu a so attività d’aostu scorsu, i cacciadori isulani ùn si dubbiteghjanu mancu di ciò chì hà da accade qualchì mese dopu. Di u cunfinamentu « dui », ùn si ne parla. L’apertura si passa propiu bè è cusì, tutte e dumenicate, e cacciamosse permettenu di tramandà l’usu è di campà issa passione.
« I reguli ùn sò micca adattati »
Iè ma dapoi u secondu cunfinamentu d’ottobre scorsu e cose si sò cumplicate assai. In causa, e restrizzione chì toccanu l’attività. Si tratta, per via di a crisa sanitaria, di regule abbastanza strette chì mettenu in periculu l’equilibriu naturale chì esce. « Ùn si tratta solu di a pratica, spiega Paul Ettori, presidente di a Federazione Regiunale di a caccia, ma di reguli chì sò pigliati in Parrghji da ghjenti ch’ùn sò micca à capu di a realità di u terrenu. »
Di fattu, l’affare principia subbitu à modu « stranu » quindeci ghjorni fà. « Cù a decisioni di u Ministeru, ripiglia u presidente, aviami appruntatu una adunita di i dui cumissioni dipartimentali per veda ciò ch’ellu si pudia fà. Ma, u ghjornu nanzu, u Prifettu avia cacciatu un arrestatu senza tena contu di i nosci bisogni è di i nosci scelti. Masimu ch’elli erani adattati à a situazioni… »
A seguita hè di u listessu « versu ». « Ani accetatu a derugazioni per i culombi è i cunigliuli in Cismonti è micca ind’è noi ! Eppuru avemi spiegatu chì isse spezie sò periculosi in Pumonti quant’è insù…I cundizioni sò assai cumplicati è ùn permetteni micca una pratica bona. In più, monda cacciadori sò azezi !
Un cullettivu ricevutu in Prifettura
Un cullettivu di i cacciadori pumuntinchi hè statu ricivutu in Prifettura a settimana scorsa per dumandà ghjust’à puntu l’autorisazione di caccighjà i culombi. « Ma ci tocca à purtà i provi chì a spezia hè nucevuli è face disguasti… »
Altru prublemu maiò, e regule chì toccanu i cacciadori. Cusì, u capimossa deve avè l’auturisazione di a merria, di a DDTN, a mossa ùn deve micca cuntà più di quindeci persone, duie à u più in vitture è micca aldilà di quaranta chilometri. « I reguli ùn sò micca adattati, in fattu ùn pigliani micca in contu a necessità di caccighjà à u nivellu di a previnzioni. Per eddi, a caccia hè solu un passatempu. »
In fine, altra inchietudine, forse a più impurtante, a crescenza di a populazione di i cignali. Si sà à pocu pressu, chè 20000 sò tombi ogni annu, un numaru chì risicheghja d’esse calatu assai. « A caccia permetta a regulazioni di i cignali. Ma cù tutti sti reguli avemi persu 40% di i nosci cacciadori. Da quì à dui mesi, a populazioni di i cignali hà da crescia, ci voli à appruntà si à cunsequenzi maiò per l’agricultura. In più di què, semi ubligati à spiegà tuttu à a ghjenti. Certi sò azezi è si capiscia ch’ani pacatu un permessu è ùn poni micca andà à a caccia ! Ùn pudemi più piattaci daretu à derugazioni ch’ùn teneni micca a strada… »
Un affare da seguità…
F.P.
Aperta dapoi u quindeci d’aostu, cum’è tutti l’anni, a caccia paca, ella dinò, e cunsequenze di a crisa sanitaria. D’attestazione in derugazione, a pratica hè di più in più limitata, cum’è d’altronde, u numaru di cacciadori. Aldilà di campà issa passione isulana, ci sarianu dinò minaccie per ciò chì tocca à certe pupulazione cum’è i cignali, i culombi o i cunigliuli….
Quand’elli ripiglianu a so attività d’aostu scorsu, i cacciadori isulani ùn si dubbiteghjanu mancu di ciò chì hà da accade qualchì mese dopu. Di u cunfinamentu « dui », ùn si ne parla. L’apertura si passa propiu bè è cusì, tutte e dumenicate, e cacciamosse permettenu di tramandà l’usu è di campà issa passione.
« I reguli ùn sò micca adattati »
Iè ma dapoi u secondu cunfinamentu d’ottobre scorsu e cose si sò cumplicate assai. In causa, e restrizzione chì toccanu l’attività. Si tratta, per via di a crisa sanitaria, di regule abbastanza strette chì mettenu in periculu l’equilibriu naturale chì esce. « Ùn si tratta solu di a pratica, spiega Paul Ettori, presidente di a Federazione Regiunale di a caccia, ma di reguli chì sò pigliati in Parrghji da ghjenti ch’ùn sò micca à capu di a realità di u terrenu. »
Di fattu, l’affare principia subbitu à modu « stranu » quindeci ghjorni fà. « Cù a decisioni di u Ministeru, ripiglia u presidente, aviami appruntatu una adunita di i dui cumissioni dipartimentali per veda ciò ch’ellu si pudia fà. Ma, u ghjornu nanzu, u Prifettu avia cacciatu un arrestatu senza tena contu di i nosci bisogni è di i nosci scelti. Masimu ch’elli erani adattati à a situazioni… »
A seguita hè di u listessu « versu ». « Ani accetatu a derugazioni per i culombi è i cunigliuli in Cismonti è micca ind’è noi ! Eppuru avemi spiegatu chì isse spezie sò periculosi in Pumonti quant’è insù…I cundizioni sò assai cumplicati è ùn permetteni micca una pratica bona. In più, monda cacciadori sò azezi !
Un cullettivu ricevutu in Prifettura
Un cullettivu di i cacciadori pumuntinchi hè statu ricivutu in Prifettura a settimana scorsa per dumandà ghjust’à puntu l’autorisazione di caccighjà i culombi. « Ma ci tocca à purtà i provi chì a spezia hè nucevuli è face disguasti… »
Altru prublemu maiò, e regule chì toccanu i cacciadori. Cusì, u capimossa deve avè l’auturisazione di a merria, di a DDTN, a mossa ùn deve micca cuntà più di quindeci persone, duie à u più in vitture è micca aldilà di quaranta chilometri. « I reguli ùn sò micca adattati, in fattu ùn pigliani micca in contu a necessità di caccighjà à u nivellu di a previnzioni. Per eddi, a caccia hè solu un passatempu. »
In fine, altra inchietudine, forse a più impurtante, a crescenza di a populazione di i cignali. Si sà à pocu pressu, chè 20000 sò tombi ogni annu, un numaru chì risicheghja d’esse calatu assai. « A caccia permetta a regulazioni di i cignali. Ma cù tutti sti reguli avemi persu 40% di i nosci cacciadori. Da quì à dui mesi, a populazioni di i cignali hà da crescia, ci voli à appruntà si à cunsequenzi maiò per l’agricultura. In più di què, semi ubligati à spiegà tuttu à a ghjenti. Certi sò azezi è si capiscia ch’ani pacatu un permessu è ùn poni micca andà à a caccia ! Ùn pudemi più piattaci daretu à derugazioni ch’ùn teneni micca a strada… »
Un affare da seguità…
F.P.
