Prima " currinlingua " : novanta chilometri à prò di a lingua corsa
Nata qualchi tempu fà, da una reflessione di a squadra di " U Cullettivu Parlemu corsu ", una corsa da u Borgu sin'à a Sulinzara si tenerà u quattru di lugliu.
Prima « currinlingua ». Novanta chilometri à prò di a lingua corsa
Nata qualchì tempu fà, da una reflessione di a squadra di « U Cullettivu Parlemu corsu », una corsa da u Borgu sin’à a Sulinzara si tenerà u quattru di lugliu. Tutti i benefizii di a manifestazione seranu dopu aduprati intornu à u sviluppu di a lingua corsa…
À Micheli Leccia, u capimachja di u Cullettivu « Parlemu corsu », idee è prughjetti à prò di a lingua nustrale, ùn li mancanu micca. Manifestazione diverse, serate, spiazzamenti à u stranieru, rivindicazione ùn si contanu più. À dilla franca, quandu certi si lagnanu sempre -averanu forse a ragiò – ellu, riflette, trova suluzione à i mette i piazza. Ognu volta senza finanziamenti. Ultima idea, urganizà una corsa à prò di a lingua corsa, un cuncettu chì esiste dighjà in parechji paesi o rughjoni cum’è u paese bascu. « Avemi travaddatu à nantu qualchì tempu, spiega Micheli Leccia, issu genaru di manifestazioni viaghja piuttostu bè in altrò. U scopu hè d’urganizà una corsa induve tutti i participanti pagana a so scrizzioni ma ùn si tratta micca di fà una corsa pà vince la. L’ogettivu hè di realizà una manifestazioni cù u passaghju d’un testimoniu tutti i chilometri. »
100 auri u chilometru
Cusì, l’idea hà fattu a so strada per sbuccà nantu à a so cuncretrisazione. Per via di a crisa sanitaria, è aspettendu l’ultime misure, a corsa, privista prima di maghju, si tenerà à u principiu di u mese di lugliu. U scopu hè di parte à sette ore di mane da u Borgu è di sbuccà in a Sulinzara, pocu impreme u tempu realizatu. E scrizzione si facenu nantu à u situ è sò aperte à tutti : particulari, associ, imprese...Cù una tarificazione di 100 auri.
« Emu fattu a scelta, aghjusta u capimachja di l’associu, di fà novanta chilometri per riprinsintà di manera simbulica i novanta pievi chì a Corsica cuntava nanzi.Pà sta prima edizioni, emi privistu cusì. Nanzi forsa d’allargà u cuncettu è di ghjunghja à francà tutti i pievi di Corsica... »
U scopu di buscà novanta chilometri, vale à di, novanta persone per corre hè statu francatu, segnu di l’interessu d’ognu per sta demarchja. U quattru di lugliu, seranu guasgi centu à corre. « Quiddu chì compra pò essa quiddu chì corri o un antra antità (parsona sola, gruppu d’amichi, famidda, impresa, cumuna...Inghji antità pò dà di più chè 100 auri, inveci, ùn pò cumprà chè un chilometru...Tandu, ci voli novanta antità per ghjunghjà à fà i novanta chilometri è novanta passadori per trasmetta u tistimoniu ogni chilometru. Ognunu pò corra più d’un chilometru ma devi essa quì per passà u testimoniu…
Nanzu à a corsa, a sfida hè dighjà una riesciuta maiò. Issu prima « Currilingua » hà da permette di racoglie guasgi 10000 auri per sviluppà prughjetti ambiziosi à prò di a lingua corsa : Duppiami di filmi, realisazione di centri d’immersioni, radiò, scole assuciative... « Hè l’uccasioni d’impignà à tutti, par ùn intarrompa a catena custituita. Ci tocca à fà sforza s’è no vulemu senta u corsu in carrughju è assicurà a so trasmissioni. »
Eccu u sensu d’issa corsa, à tempu, festiva, spurtiva è culturale. Passà un bellu mumentu circhendu à agisce à modu cuncretu à prò di a lingua corsa. Un cuncettu chì, speremu, si scriverà à longu andà…
Ph.P
Currinlingua
Infurmazione è scrizzione : 06-78-65-20-72
https://parlemucorsu.corsica
Nata qualchì tempu fà, da una reflessione di a squadra di « U Cullettivu Parlemu corsu », una corsa da u Borgu sin’à a Sulinzara si tenerà u quattru di lugliu. Tutti i benefizii di a manifestazione seranu dopu aduprati intornu à u sviluppu di a lingua corsa…
À Micheli Leccia, u capimachja di u Cullettivu « Parlemu corsu », idee è prughjetti à prò di a lingua nustrale, ùn li mancanu micca. Manifestazione diverse, serate, spiazzamenti à u stranieru, rivindicazione ùn si contanu più. À dilla franca, quandu certi si lagnanu sempre -averanu forse a ragiò – ellu, riflette, trova suluzione à i mette i piazza. Ognu volta senza finanziamenti. Ultima idea, urganizà una corsa à prò di a lingua corsa, un cuncettu chì esiste dighjà in parechji paesi o rughjoni cum’è u paese bascu. « Avemi travaddatu à nantu qualchì tempu, spiega Micheli Leccia, issu genaru di manifestazioni viaghja piuttostu bè in altrò. U scopu hè d’urganizà una corsa induve tutti i participanti pagana a so scrizzioni ma ùn si tratta micca di fà una corsa pà vince la. L’ogettivu hè di realizà una manifestazioni cù u passaghju d’un testimoniu tutti i chilometri. »
100 auri u chilometru
Cusì, l’idea hà fattu a so strada per sbuccà nantu à a so cuncretrisazione. Per via di a crisa sanitaria, è aspettendu l’ultime misure, a corsa, privista prima di maghju, si tenerà à u principiu di u mese di lugliu. U scopu hè di parte à sette ore di mane da u Borgu è di sbuccà in a Sulinzara, pocu impreme u tempu realizatu. E scrizzione si facenu nantu à u situ è sò aperte à tutti : particulari, associ, imprese...Cù una tarificazione di 100 auri.
« Emu fattu a scelta, aghjusta u capimachja di l’associu, di fà novanta chilometri per riprinsintà di manera simbulica i novanta pievi chì a Corsica cuntava nanzi.Pà sta prima edizioni, emi privistu cusì. Nanzi forsa d’allargà u cuncettu è di ghjunghja à francà tutti i pievi di Corsica... »
U scopu di buscà novanta chilometri, vale à di, novanta persone per corre hè statu francatu, segnu di l’interessu d’ognu per sta demarchja. U quattru di lugliu, seranu guasgi centu à corre. « Quiddu chì compra pò essa quiddu chì corri o un antra antità (parsona sola, gruppu d’amichi, famidda, impresa, cumuna...Inghji antità pò dà di più chè 100 auri, inveci, ùn pò cumprà chè un chilometru...Tandu, ci voli novanta antità per ghjunghjà à fà i novanta chilometri è novanta passadori per trasmetta u tistimoniu ogni chilometru. Ognunu pò corra più d’un chilometru ma devi essa quì per passà u testimoniu…
Nanzu à a corsa, a sfida hè dighjà una riesciuta maiò. Issu prima « Currilingua » hà da permette di racoglie guasgi 10000 auri per sviluppà prughjetti ambiziosi à prò di a lingua corsa : Duppiami di filmi, realisazione di centri d’immersioni, radiò, scole assuciative... « Hè l’uccasioni d’impignà à tutti, par ùn intarrompa a catena custituita. Ci tocca à fà sforza s’è no vulemu senta u corsu in carrughju è assicurà a so trasmissioni. »
Eccu u sensu d’issa corsa, à tempu, festiva, spurtiva è culturale. Passà un bellu mumentu circhendu à agisce à modu cuncretu à prò di a lingua corsa. Un cuncettu chì, speremu, si scriverà à longu andà…
Ph.P
Currinlingua
Infurmazione è scrizzione : 06-78-65-20-72
https://parlemucorsu.corsica
