Sapé Fa : I ghjuvelli nustrali di Saveria Geronimi

Sapè Fà

I ghjuvelli nustrali di Saveria Geronimi


In u so attellu di u Parc Berthault in Aiacciu, Saveria Geronimi cuncepisce, sottu à a so grinfia « Germes Créateur » ghjuvelli di tutte e forme è à tutti i prezzi. Una creatrice chì hà fattu a so strada dopu à un percorsu particulare è chì raccoglie, oghje, i frutti di u u travagliu...


In a vita, u destinu ci porta induve avemu privistu d’andà, pocu impreme a nostra vulintà. Cusì, ci sò percorsi più o menu cumplicati chì sbuccanu quantunque nantu à belle surprese. Di ceppu artisticu è cù dui fratelli musicanti (u so picciu Antò) è una mamma pittore Saveria Geronimi hè stata ciuttata, da zitella, in issu bagnu quì. A scelta di i ghjuvelli ? « S’hè imposta da per ella, spiega l’artista, à 12 anni, faciu dighjà creazione. »

Eppuru, issu percorsu hà messu u tempu per mettesi in piazza. Una vintena d’anni.

Frà tempu, Saveria face studii di...biulugia (chì l’anu da serve ma più tardi) è si ne parte in Inghliterra cù, dighjà, a voglia di travaglià intornu à i ghjuvelli. Senza sapè, à l’epica, di chè manera è chè materia aduprà. « Ciò chì era sicuru, aghjusta l’artista, hè ch’eu vuliu creà a me marca di ghjuvelli... »

Cusì, Saveria face parechje furmazione cù qualchì ghjuvellaghju rinumatu. Nanzu, in u 2006, di fà nasce « Germès ». « Parolle chì parlanu è à tempu, ci sò S è G di u me nome è a me casata. A seguita hè una manera di germinà ch’aghju sempre vulsutu travaglià a terra. »

Arriccihita da una sperienza à u stranieru (Inghliterra, Scozzia) è dopu à parechje mostre induve face cunnosce u so travagliu, Saveria hà a voglia di vultà ind’è ella. « Vuliu esse à mezu à i mei è à tempu creà ind’è mè. Una logica chì s’hè imposta di manera naturale. »


Dopu à u so ritornu, l’artista si stalla, à mezu à d’altri, in u quartieru di San Ghjuvà sottu à u pannellu « Creatori ». Ma u fattu maiì di u so percorsu serà quattru anni fà in u Parc Berthault induve l’attellu « Germès » apre, in fine, e so porte. Hè quallà ch’ella cuncepisce cullane, annelli, braccialetti, pindini fatti in oru, argentu, diamanti, smeraldu, zaffiru ma dinò cù mettali menu preciosi. «Una manera di prupone prezzi per tutti…Sò un artisgianu indiatu chì adopra un cuncettu particulare. Tutti i mettali aduprati ùn venenu da mine ma d’affinadori chì riciculaghjenu e materie. »


Ghjuvelli identitarii

In u so travagliu, Saveria adopra una tecnica persunale, fatta di mettallu in fusione o fretu. Si tratta, tandu, per via di u so cantu artisticu, di fronde è picculi stecchi di scopa o altri intarsiate nantu à i so ghjuvelli. Cusì, hè nata ‘Stampa corsa », una cullezzione di ghjuvelli nustrali bulicati cù scorza di laricciu. Ma Saveria, ùn s’arresta quì. Dapoi qualchì tempu, face parte di « Carré d’art », una struttura chì adunisce tutti i mistieri d’arte di Corsica. S’impegna dinò in u Dui Sorru (t’hà e so radiche in Arburi) cù una buttega « Le National » creata in Vicu induve l’artisgiani di u rughjone ponu fà cunnosce e so creazione. Ùn si contanu più e so mostre (Caroussel du Louvres, Parrighji, Marseglia…). Pertuta dece anni à u stranieru, per vultà megliu ind’è ella, eccu u percorsu d’una creatrice isulana chì prupone un sapè fà chì mette in vale a so isula...

Ph.P.


« Germès créateur », 26 cours Lucien Bonaparte, 20000 Ajaccio
Tel : 06-24-95-78-28
www.germescreateurbijoux.com