Una tela dedicata à i Resto di u Core

Una tela dedicata à i Resto di u Core

Nata da Lorie Renaud è André Lo Giudice, dui pittore chì facenu a so strada dapoi anni, una tela cù u visu di Coluche nantu à un fondu culuritu hè in vendita à l’asta sin’à u primu di marzu.


Un prughjettu caritavu hà adunitu, pochi tempi fà, dui artisti, Lorie Renaud è André Lo Giudice. Duie persone passiunate d’arte è chì anu messu u tempu per piglà un caminu artisticu à u sensu u più nobile. In Corsica dapoi ondeci anni, Lorie Renaud, cum’è d’altronde André Lo Giudice, hè bagnata nantu à e mine è i culori dapoi zitella. A pittura ? « Una revelazione, spiega l’artista, à 18 anni, vidiu tele culurite di u me babbu, ci era u muvimentu è a goia. Hè què chì m’hà datu a passione di s’arte. »

André, ellu, hè sempre statu un manuale. Creazione di mobuli, travagliu di u legnu, micca forse a pittura ma un arte à modu soiu, d’una certa manera. « A pittura hè un miraculu, spiega iss’omu di ceppu siciliano ma chì hà campatu monda in Marseglia è u so circondu, sò in Corsica dapoi dodeci anni, m’hè sempre piaciutu u disegni ma ci vulia prima, à manghjà è l’arte passava à u secondu pianu. Dapoi ch’eu sò à a retirata, mi sò cuncentratu nantu à issa passione. »

Una passione appena « addurmintata » ind’è Lorie ma chì s’hè svegliata qualchì annu fà. « Trè anni fà,aghju scontru un artistu corsu è issa passione hè vultata. »

Dapoi, l’artista ùn pensa ch`à pinghje, « a casa hè trasfurmata in attellu di pittura, spiega Julia (11 anni), una di e so duie zitelle. L’artista, ella, travaglia à l’acrilicu è l’oliu, u figurativu è appena d’astrattu. È dapoi trè anni n’hà fattu u so mistieru. « Travagliu à spessu nantu à cummande. A pittura hè un bisognu per mè. »

Da u so cantu, André pinghje senza limite nè scopi precisi. « Partu in tutti i sensi, mi piacenu monda i culori... »


Ver di d’amtri prughjetti

Tutti i dui sò cummossi da a situazione di u mondu. Di fattu, si volenu di manera naturale, impegnà à prò di l’assuciativu è u caritativu. L’idea di travaglià inseme hè nata qualchì tempu fà à l’occasione d’una ghjurnata France-Alzheimer Corsica. « Ci era una tela in vendita, aghjusta Lorie, è vuliu sparte un prughjettu in cumunu cù un altru artistu. Ma ci vulia à dà un sensu à issu prughjettu. »

U scontru cù André Lo Giudice face u restu. « Purtemu Coluche in u nostru core tutti i dui, dice l’artistu, subbitu, semu stati d’accunsentu per fà una tela inseme. Ma prima, era per i Resto di u Core. Ùn hè chè dopu, ch’è noi t’avemu scambiatu u versu è pinsatu à una tela in vendita à l’asta. »

In trè settimane, a tele hè stata fatta. Nantu à misure di 90x90, ritruvemu un ritrattu di Coluche fattu in biancu è neru da Lorie è u fondu assai culuritu d’André. A tele hè in vendita sia nantu à pagina Facebook di i dui artisti, sia in messaghju privatu. « Si pò fà una pruposta, a vendita compie u primu di marzu. » A racolta di a vendita serà rimessa à i Resto di u Core.

L’avvene ? Un’affresca dedicata à Daniella Casanova in a scola San Ghjuvà, un’altra per a Cità d’Aiacciu è in Sarrula, un travagliu in arte terapia cù France Alzheimer per Lorie è una mostra à a galleria Flotte in Sanary per André chì hà da cuntinuà à sprime u so arte. È forse, un prughjettu novu in cumunu…


F.P