Sapè Fà : By B Design

By B Design : l’arte mudernu d’Henri Bagnoli


Stallatu in Bastia cù a so cumpagna, Henri Bagnoli cuncepisce mobuli fatti di legnu nobili, ma dinò luminarii, adurnamenti diversi è ancu santoni in tempu natalescu. Un artisgianu chì cerca à sviluppà a so attività à modu soiu trà mudernità è tradizione…


Difficiule, dopu à studii di corsu è di storia di piantà tuttu per esse artisgianu è travaglià u legnu. Henri Bagnoli, ellu, ùn s’hè micca postu a questione. Dopu à un master 2, face issa scelta di manera naturale. Ma, ci hè vulsutu à aspettà qualchì mese. « Eru passiunatu di storia, spiega l’artisgianu, è sopratuttu di tuttu ciò chì tocca da luntanu o micca, à a religione. Ma subbitu dopu à i studii, ci vulia à travaglià. Ciò ch’è n’avemu fattu cù a me cumpagna. »


Da a storia à u mistieriu d’artisgianu

Tandu, si sceglie a resturazione durante ottu anni. Frà tempu, a passione di u travagliu manuale, cresce à pocu à pocu. Cù a so cumpagna, Carine, Henri Bagnoli principia à fà qualchì prova cum’è un mobulu in legnu per u caffè « U San Petrone » in Bastia. Design by B hè in marchja. Strada facendu, u coppiu d’impegnà si à prò di u mistieru d’artisgianu, subbitu di travaglià à modu soiu. « A pittura, a scultura, tuttu ciò chì hè manuale m’hè sempre piaciutu, aghjusta Henri Bagnoli, tandu hè statu faciule di francà u passu. Avemu seguitatu una furmazione per amparà à travaglià i legni, a terra rossa è d’altre materie, eppo avemu principiatu. »

Stallatu in u quartieru di San Ghjuvà in Bastia, u coppiu hà fattu a scelta d’accuncià a so casa di manera à creà u so attellu. Tandu, si campà sopra è si travaglia sottu. Si travaglia u legnu (mobuli di casa), ma dinò a tarra rossa o d’altri arnesi per cuncepisce luminarii, ugetti d’adurnamenti. Un inseme trà mudernità è tradizione.


Un’anima artistica

Di fattu, Henri è Carine, a so moglia, facenu pezze uniche chì dumandanu assai travagliu, ricerca (ci vole à taglià, sigà, lustrà, seccà). Henri taglia è face à scultura, è Carine e finizione (pittura, accunciamentu di e pezze e più chjuche…). Cusì, nascenu, tavule per manghjà o basse, mobuli TV, sottupiatti, luminarii diversi, tele accunciate cù una tecnica muderna, u fluid painting. L’anima artistica d’Henri è, d’una manera generale, a creatività di u coppiu, l’anu permessu di mette in piazza, qualchì tempu fà, un cuncettu mudernu, « By B Design».

A passione d’Henri per a religione s’hè, à tempu, sviluppata, in tempi nataleschi, in a creazione di santoni è tanti persunaghji chì si mettenu in i presepii. « Mi piace assai l’aspettu tradiziunale. Hè per quessu ch’è noi travagliemu nantu à legni nobili cum’è u castagnu, a leccia, u piobbu. Per u reste, sò tecniche uniche induve aghjustemu a rasgina... »

Di ceppu nustrale, e creazione d’Henri è Carine anu issa particularità di bulicà è prumove, à tempu, l’identità corsa è una certa mudernità.

Ph.P.

By B Design
Avenue Macchione
Résidence San Ghjisè
Bâtiment C
20200 Bastia

site internet : www.bybdesign.fr