Sapé Fà : Natali Figarella , spurtellaghja << nustrale >>
Stallata in u Silvarecciu, Natalina cuncepisce sporte, casgiaghje è nasse ,tutti intrecciati cù.
Sapè fà / Natalina Figarella, spurtellaghja « nustrale »
Stallata in u Silvarecciu, Natalina Figarella cuncepisce sporte, casgiaghje è nasse, tutti intrecciati cù l. Un usu anticu ch’ella hè unu di i soli à mantene…
D’una passione, hè natu un mistieru. Eccu cumu si puderia definisce à Natalina Figarella, stallata in core di a Castagniccia (U Silvarecciu) ma cù radiche in Figarella, da sopra à Miomu è in Carghjese induve ella hà passatu a so zitellina. Hè, d’altronde, in Carghjese è Piana chè a spurtellaghja hà amparatu l’essenziale ciò chì diventerà più tardi u so mistieru…
« Aghju sempre vistu intreccià i pescadori, spiega Natalina, in Piana è Carghjese ma dinò in u quartieru di u Borgu in Aiacciu. Di fattu, u me babbu avia vistu fà i vechji. Aghju fattu cum’è ellu per amparà. Ùn ci hè bisognu di scola, basta à fighjulà. Tempi fà, sacchi, ùn ci n’era, ci vulia à fà sporte, avianu un’utilità.»
Un travagliu à l’usu anticu
A spurtellaghja ampara dunque à intreccià nasse ma dinò curbelle, fattoghje casgiaghje è sporte di parechji mudelli. Ùn hè chè dopu à d’altre attività chè, trenta anni fà, decide di fà ne u so mistieru.
Ci serà prima, a nascita d’un associu « A spurtellaghja » cù Vannina, un’amica di Portivechju, eppo un’impresa.
Natalina Figarella travaglia à l’usu anticu. Per taglià i so legni -castagnu, ghjuncu, mortula, ugliastru, vincu) s’acconcia nantu à a pusizione di a luna. « Tagliu a mortula à a luna nova, aghjusta a donna, per u castagnu è u vincu, hè a vechja luna. Per ciò chì tocca à u ghjuncu, si dipende chè ci vole à fà lu bolle. »
Ma l’affare ùn hè compia. Si tratta, dopu, di fà siccà u legnu nanzu di principià à intreccià. Cusì, Natalina cuncepisce curbelle, casgiaghje, sporte, nasse per i pescadori... »U travagliu di u castagnu hè monda più difficiule, aghjusta a spurtellaghja, mi tocca à taglià e rame à e radiche di u pede di l’arburu cù un falcione. Dopu, ci vole à fà lu siccà. In i tempi, si faccia à u sciaminè, oghje avemu pratiche più muderne. In fine, ci vole à taglià pezzi in dui per fà e sporte. Hè un travaglione chì dumanda monda tempu. »
Imbasciatrice di i mistieri d’arte
Ci vole à cuntà da 10 à 14 ore di travagliu -dui à trè ghjorni in tuttu-, per fà una sporta in castagnu. Appena menu -da trè à ottu ore- per una sporta in mortula o vincu. Ciò ch’ùn permette micca di campà di u mistieru di manera « nurmale ». « S’è noi cuntemu l’ore, hà da esse difficiule, per a ghjente, di cumprà una sporta. Ci sò parechji mudelli, chjuchi, mezani, maiò ma ùn possu dò ch’eu campu di u me mistieru. »
Per allargà a so attività, Natalina face e crucette è travaglia i palmi à l’iniziu di a settimana santa, cuncepisce dinò ugetti diversi d’adurnamenti, conta nantu à e fiere è cerca à tramandà u so sapè fà in e scole in Aleria, Corte è in Cismonte. « Cercu à fà travaglià i zitelli...Ci sò dinò stazii per i chjuchi è i maiò, hè impurtante di tramandà u nostru travaglià per fà ch’ell’ùn si perdi. »
Cinque anni fà, Natalina hè stata numata da una ghjuria cumposta di specialisti, imbasciatrice di i mistieri d’arte. Una manera di ricunnosce un usu chì, certu, currispundia à un modu di campà ch’ùn esiste più, ma chì participeghja di u sapè fà è di l’identità corsa. Un usu dunque da mantene…
Ph.P.
Natalina Figarella
Prunciali, 20215 Silvarecciu
Tel : 06-83-30-16-61
Facebook/Messenger
@noelle.figarella
situ : www.natalina.odexpo.com
