A festa di a natura piglia i so quartieri in Murzu

A festa di a natura piglia i so quartieri in Murzu

A manifestazione nata in u 2012 è sempre urganizata in Vicu, si passerà questu annu in Murzu urganizata da l’associu « Natura ». Animazione, cunferenze, canti è musiche, intornu à una tematica, liata, di sicuru, à l’ambiente sò previsti tutta a ghjurnata issa dumenica.

« Evoluzione climatica. Chì ne serà di a Corsica in u 2050 ? » Eccu a tematica scelta da a squadra di l’associu « Natura » chì urganizeghja issu ottu di maghju, a decesima edizione. Per a prima volta, a manifestazione hè prevista in Murzu per sparghje a demarchja nata in Vicu altrò. « L’idea hè nata in u 2012, spiega Elodie Paoli, presidente, u scopu hè di mette in vale tematiche impurtante è masimu quella di l’ambiente. »

Di fattu, a manifestazione hè nata à l’iniziu d’un idea di François Paoli chì, s’ellu s’era impegnatu in Vicu à prò di a Festa di a Natura, hè di ceppu murzese è hà vulsutu dunque mette in piazza iss’edizione in Murzu cù una squadra nova induve ritruvemu ghjovani di u paese cù, à u capu Elodie Paoli. Una vulintà di François Paoli dapoi ch’ellu hè merre di u paese. Una manera, dinò di sviluppà a cumuna è fà cunnosce Murzu dighjà rinumatu cù « Mele in Festa ». « Ci semu arrimbati nantu à a listessa demarchja, aghjusta a presidente, a tematica scambia tutti l’anni intornu à tuttu ciò chì tocca à a natura : piante, arburi, ma sopratuttu l’ambiente è u periculu di u scambiamentu climaticu. Un imbusca maiò à più o menu longu andà. »


Quaranta banchi

U scaldamentu climaticu serà, ghjust’appuntu a tematica d’iss’ edizione quì cù duie cunferenze d’Antoine Orsini, Jean-Louis Rossi è Gabriel Chapuis (di Balogna) chì ghjunghjerà à prisentà qualchì pianta. L’occasione cù iss’inseme, di spiegà, scambià è sensibilizà a ghjente nantu à e cunsequenze di u scambiamentu climaticu chì ponu esse impurtante per l’isula è à cortu andà. In fine, è masimu in u paese chì accoglie « Mele in Festa », ci serà un’animazione sempre in leia cù l’ambiente, à a casa di u Mele piazza à a ghjesgia. Eppo quaranta artisgiani è pruduttori isulani senza sminticà attelli dedicati à i più chjuchi. « Postu ch’è noi semu membri di a FFRAAC, accettemu solu pruduttori è micca ghjente ghjunti à vende. » S’aspetta, di sicuru, assai mondu s’è u tempu hè à l’appuntamentu. « Avemu circatu à rilancià a manifestazione masimu ch’ùn ci hè più nulla dapoi dui anni. Nanzu à l’estate, hè una bona per noi. Avemu appruntatu a manifestazione in puchissimu tempu. L’associu hà ripigliatu menu di dui mesi fà, hè appena cortu ma l’inseme tene quantunque a strada. »

Dui à dui anni abbastanza difficiuli è a perdita di Dorothée Velutini, u so merre, a cumuna di Murzu ripiglia fiatu in core di u veranu cù a Festa di a Natura nanzu u vultà di « Mele in Festa » à a fine di settembre accunciatu cù u Trail è un travagliu chì principia nantu à a valurisazione di Muna.

Ph.P.



Prugramma

10.00 : apertura di a Festa di a Natura
11.00 : messa
13.00 : cunferenza d’Antoine Orsini
14.00 : cunferenza di Jean-Louis Rossi nantu à i risichi di u scaldamentu climaticu
16.00 : cuncertu di a scola di cantu di Natale Luciani
16.30 : attellu di viulinu tradiziunale
17.00 : tombula