Scola Corsa !

Scola corsa : una terza struttura di settembre in Sarrula


A struttura nata l’annu scorsu aprerà una terza scola di settembre nantu à a cumuna di Sarrula Carcupinu. A prima in Pumonte. D’altre seguiteranu forse à più o menu longu andà.


Quand’ella apre e duie prime strutture in Bastia è Biguglia di settembre scorsu, a squadra di « Scola Corsa », purtata da Ghjiseppu Turnchini vole scrive u cuncettu à longu andà. Un annu dopu, a prima sperienza hè stata un successu maiò cù parechje persone, eletti, particulari o associ chì si sò monda impegnate. Per prove, cinque classe è vinticinque sculari per una prima annanta. Una bona. Ma si sà, à tempu chè u scopu era subbitu d’allargà l’idea è di sviluppà aldilà di u rughjone bastiacciu. « Un prublema maiò ch’avemu scontru, spiega u respunsevule di Scola Corsa, hè quellu suldarinu. Pudemu cuntà, per avà, nantu à e sottuscrizzione ma a longa andà, serà difficiule. Ci tocca dunque, à truvà suluzione da scrive u cuncettu in u tempu, creà una vera dinamica è sviluppà l’idee. »


Nove mesi di travagliu

Strada facendu, a squadra hà avutu un cuntattu cù Francescu Alfonsi, deputatu aurupeu è Mathieu Ceccaldi. « Ci hè statu a pussibilità d’apre una scola nantu à a cumuna di Sarrula, aghjusta Ghjiseppu Turchini, ci simu scuntrati è l’affare hà pussutu avanzà pian’, pianinu. »

Di nuvembre scorsu, u capifila di Scola Corsa accumpagnatu da Maria Lucia Santoni è di Marie-Laurence Sotty, tutte e duie di a municipalità di Sarrula, hè andatu in Béziers per travaglià nantu à l’idea cù Uccitani. Dopu, una delegazione purtata da Alexandre Sarrola, merre di a cumuna, hè cullata in Bastia per mette in piazza a struttura.

Cusì, l’idea hà pussutu, à pocu à pocu, esse cuncretizata dopu à nove mesi di travagliu. U situ era, à tempu, guasgi prontu per accoglie a struttura...nanzu a scuperta, qualchì tempu fà, di tigliu sopra piazza. « Ci hè vulsutu à scambià appena. Tandu, aspettendu i travagliu, avemu pussutu vede cù u centru aeratu vicinu à u culleghju di Baleone. Postu ch’ell’ùn hè pigliatu chè in dumenicata è u mercuri, avemu pussutu arrimbà ci à nantu per ciò chì tocca à u durmitoriu, a sala di mutricità, i sanitarii è a cucina. Per a scola, ci seranu strutture in Algeco. »


Marceddu Jureczek presidente

A scola aprerà di settembre cù una decina di sculari. Sapendu chè ogni struttura travaglia sottu à Scola Corsa ma cù un associu propiu. In Sarrula, serà Marceddu Jureczek u presidente.« Ùn ci hè statu publicità ch’ùn avemu avutu tempu di fà la. E scrizzione sò ghjunte tardi. Avemu zifratu una cunvenzione cù a merria di Sarrula. Simu felici di cuntà nantu à sta terza scola. »

Frà tempu, è dopu avè ricivutu trè candidati putenziali, a squadra di Scola Corsa hà fattu a so scelta. « L’affare avanza, si rallegra Ghjiseppu Turchini, ma u prublema di e finanze hè impurtante. Circhemu à zifrà una cunvenzione cù u Statu per ch’ellu pigli in carica l’insegnante. Per u restu, ci hè una furmazione à l’AFP di Corti per avè ATSEME. »

Cù e sottuscrizzione private, a squadra di « Scola Corsa » hà pussutu racoglie 130000 e. L’aiutu di a CdD anu permessu, d’altronde, d’ottene 80000 e. U cuncettu face, dunque a so strada. « Ci serà una prima scola, di settembre in Pumonte, masimu in u circondu bastiacciu, avemu da circà, avà à allargà dinò a nostra struttura. »

Un cuncettu chì face a so strada. Guasgi una scola à l’annu, una bona.

Ph.P.