Sapè Fà : << Tafanelli >>, i panni nustrali di Matthieu Guegan
Stallatu in Parrighji ma di ceppu balaninu, Matthieu Guegan hà fattu a scelta, in tempi di u cunfinamentu, di cuncepisce panni è sopratuttu veste in tele di battellu. U tuttu sottu à una marca referenza « Tafanelli », di u nome di a so mamma…
Sapè fà : « Tafanelli », i panni nustrali di Matthieu Guegan
Stallatu in Parrighji ma di ceppu balaninu, Matthieu Guegan hà fattu a scelta, in tempi di u cunfinamentu, di cuncepisce panni è sopratuttu veste in tele di battellu. U tuttu sottu à una marca referenza « Tafanelli », di u nome di a so mamma…
I Corsi d’altrò anu sempre, per a maiò parte, u stintu nustrale è sopratuttu a voglia di vultà in casa quandu ne anu a pussibilità. D’un’altra parte, ci n’hè ch’anu da circà a manera di bulicà l’estru anticu cù una vita più « muderna » diciaremu, arrimbati nantu à issu qualcusellu tramandatu da i so vechji. Cusì, hè ingrandatu Matthieu Guegan Tafanelli, di ceppu brittonu d’u cantu di u so babbu è balaninu (Montemagiore) è Taravese (Petretu è Bicchisgià) di u cantu di a so mamma. « U mondu hè chjucu ma a squadra hè maiò, scrive d’altronde Matthieu nantu à u so situ. Una referenza à i so viaghji, ma dinò a so zitellina passata in Balagna.
Da Strasbourg à a Corsica
Eppuru, l’omu di vinticinque anni ùn hè crescitu nè in Balagna, nè in Brittagna ma in...Strasbourg induve camapavanu i so parenti. « Ma aghju passatu tutte e mo vacanze in Montemaggiore ind’è a mo mammona. Tanti belli ricordi...Simu di stu paese ma dinò d’altri lochi di Balagna (Zilia, Lunghiniano…) è ancu di u Taravu per via di a famiglia Franchi... »
S’ellu hà campatu altrò, Matthieu Guégan hà sempre avutu l’amore di a so isula...È qualchì idea prufessiunale liata, ghjust’appuntu à a so zitellina. Cusì, è dopu à a studii di cumerciu Edhec in Lille durante quattru anni, li vene l’idea di travaglià nantu à un prughjettu di marca corsa. « Tafanelli » avanza à pocu à pocu. U tempu di seguità una furmazione in Londres ind’una di e scole di moda e più rinumate di u mondu, è u Balaninu principia u so prughjettu. « L’idea hè nata in tempi di u cunfinamentu, aghjusta Matthieu, eu vulia lancià l’impresa ma a crisa sanitaria hè ghjunta. Ci eranu quantunque qualchì maglietta, avemu cumenciatu à travaglià à prò di tutti i medichenti cù l’associu « Protège ton soignant ». Avemu vendutu tante magliette per aiutà li è l’affare ci hà fattu cresce. »
A vesta « Roccapina »
Cù issu passu in davanti, a struttura nasce. « Tafanelli », in referenza à a so mamma. Creata, prima per fà impermeabili, a marca scambia subbitu di strada. « Più ch’una marca, simu un cuncettu. Avemu vulsutu travaglià nantu à prudutti di qualità a più alta. L idea hè ghjunta di creà una vesta o mantelli fatti cù una tele di battellu. Ma un bellu pruduttu. »
Cuncepitu in l’attelli parrighjini, u pruduttu si vende nantu à u situ di a marca, accantu à d’altri prudutti : magliette, sweet, mantelli, per omi è donne è sottu à parechji nomi (Corsica, Sperone, Maquis…) Ma hè u prughjettu « Roccapina » chì custituisce u pruduttu maiò di a squadra. « L’affare face a so strada, spiega Matthieu Guégan, cuntentu quantunque di u sviluppu di a so marca, u prughjettu ùn hà chè trè anni ma avanza abbastanza bè. Avemu vendutu centu pezze... »
S’è tuttu ciò chì tocca à a logistica è a cuncipitura sò fatte in Parrighji, u capimachja di l’impresa vole andà ancu più luntanu. « À cortu andà, u scopu hè di pudè fabricà i prudutti i Corsica. Spergu chè da quì à un annu, serà fattu... »
Un altra scumessa per u Balaninu chì conta da un altru soffiu à « Tafanelli ».
Ph.P.
Tafanelli
cuntattu : 06-87-39-52-61
www.tafanelli.fr
