Un << Girandulò >> per spassighjà in u mondu sanu
A l'iniziativa di u situ bilinguu di a scola di i canni in Aiacciu, un spettaculu,.....
Un « Girandulò » per spassighjà in u mondu sanu
À l’iniziativa di u situ bislinguu di a scola di i Canni in Aiacciu, un spettaculu, chì mette in scena tutte e classe da a sezzione di i maiò sin’ à u CM2 serà prisentatu issu venneri nantu à scena di u spaziu Diamante, in Aiacciu…
Visità i cinque cuntinenti cù un persunaghju corsu chjamatu « Girandulò », eccu u prughjettu novu appruntatu questu annu da a squadra pedagogica di a scola di i Canni, in Aiacciu. L’idea era d’arrimbà si nantu à un libru dedicatu, ghjust’appuntu à i sculari, chì mette in vale a geugrafia, l’animali, a storia, e piante o a cultura d’ogni locu. Un travagliu cù i membri di l’associu « Prima scena » hà permessu di creà un spettaculu d’un’ora è mezu. Tandu, si principia cù a sezzione di i maiò cù i populi Innuiti, u tuttu arrimbatu nantu à libraccioli dedicati dinò à i sculari. Strada facendu, u persunaghju « n’hà una techja di a Corsica », piglia un biglettu d’avviò è si ne parte in Australia, a so prima destinazione. « U scopu, spiega a squadra pedagogica, hè di mette in vale tutte e particularità d’ogni cuntinente è di travaglià, cusì cù i zitelli nantu à parechje tematiche. U tuttu, di sicuru, mittendu in vale a lingua corsa. »
Cinque cuntinenti, cinque tematiche...
Cusì, in Australia, « Girandulò », scopre persunaghji (cangurù, dingò, filetta, papagallu) è face parangonu cù animali o piante corse. Ogni volta, a listessa struttura vene à compie a scena : « Ellu, ùn hè micca di quì...Issi turisti, ùn capiscenu nunda. »
Da l’Australia, u persunaghji si ne và in China. Tandu, si scopre u capu d’annu chinese, a muraglia di China, Bruce Lee o i pandà. È passemu à i Ce1 cù l’Africa. Quì si tratta di u liò, a sgiraffa, a zebra è ancu una certa...Cleopatra. Altra particularità, i scritti, cuncepiti da e maestre è i membri di l’associu « Prima Scena », rispettenu a parlata d’ogni insegnante. Si passerà, dunque, da u pumonte à u cismonte. Dopu à l’Africa, « Girandulò » franca a famosa porta di e stelle è sbarca in Greccia in tempi d’Homère, à fiancu à Ulisse è i so marinari, piattati ind’a sapara di u ciclopu Pulifemu. « Hè l’occasione di trattà d’issa pagina di a storia cù tutti issi persunaghji di a mitulugia grecca. Avemu circatu à esse arrimbati nantu à i prugrami di questu annu. »
Si scoprerà dunque, à fine d’issa scena dedicata à i CE2, chè Girandulò face rigalu à Ulisse d’un...GPS. « U fattu burlescu permette ghjst’appuntu di sviluppà, nantu à un modu chì piace à i zitelli, a lingua corsa. »
Cù i CM2, u persunaghju sbarca in America Suttana è scontra Cuscò, cità peruviana, piante, animali è ancu dui famosi ghjucadori di ballò : Pelé è Messi…In fine, l’odore di a machja corsa li manca è volta ind’è ellu. Frà tempu, arrimbatu nantu à un libru di Stefana Padovani, si tratta d’un paese induve u mulizzu è u focu anu pigliatu a suprana. Tandu Girandulò chjamerà à u Capitanu Corsica per luttà contru à i Trappanetti, dui gattivi sughjetti... « L’inseme ci hà permessu di sfruttà tutte e tematiche è ci vole à ricunnosce chè l’idea hè piaciuta à tutti i zitelli. »
U spettaculu hà da esse prisentatu issu venneri nantu à a scena di u Spaziu Diamante…A squadra pedagogica, ella, riflette à un’altra tematica per l’annu chì vene.
F.P.
