Sapè Fà : Canal artistique, l'arte mudernu di Cécile Mattei-Lanata
Stallata in l’Isula Rossa, Cécile Mattei-Lanata hà creatu trè anni fà cù Vincent u so fratellu, è Yves, un amicu, « Canal artisque », una buttega dedicata à affissi ma à tempu, panni, sacchi, barrette diverse cù i disegni di i dui artisti…
Canal artistique : l’arte mudernu di Cécile Mattei-Lanata
Stallata in l’Isula Rossa, Cécile Mattei-Lanata hà creatu trè anni fà cù Vincent u so fratellu, è Yves, un amicu, « Canal artisque », una buttega dedicata à affissi ma à tempu, panni, sacchi, barrette diverse cù i disegni di i dui artisti…
Semu in l’Isula Rossa induve Cécile Mattei-Lanata hà e so radiche. Anziana sicretaria medicale, hà fattu a scelta, trè anni fà, di scambià d’attività è di ciuttà si in l’universu di u cummerciu è di l’arte, aprendu un locu particulare. Una spezia di galeria dedicata à l’affissi. « Mancava qualcosa in l’Isula, spiega a donna, una buttega induve ci seria qualcosa di burlescu, à l’usu macagna, un’uchjata d’issu generu quì. »
À l’iniziu d’issu prughjettu, ci era un’idea. Quella d’apre issu locu dedicatu solu à l’affissi. Specialisti d’iss’arte quì, Vincent Lanata è Yves Gaillou, chì t’anu tramindui un veru talente, facianu tanti disegni : affissi di l’anni ottanta, tele diverse assai culurite cù tituli à l’usu di a macagna « lascia corre », « putenza », « acqua in bocca ». L ‘idea face a so strada. « A ghjente eranu propiu cuntenti di vede iss’affissi quì, aghjusta Cécile, ci era una vera dumanda. »
Da l’affissi à i panni
Subbitu è malgratu u successu d’issu cuncettu novu, Cécile hà l’idea d’andà aldilà di l’affissi. « Mi sò dettu ch’è no pudiamu prufittà di u talente di Vincent è Yves per andà più luntanu è creà una marca di panni cù i so disegni stampati à nantu. »
L’affare piglia, lestru lestru, un’altru versu. U tempu di riflette in trè sta volta, è « Canal Artistique » hè in marchja. Cécile si mette à cumandà testile diversi : barrette, sacchi, magliette, lane, sweet... Dopu, chjama à un specialistu di a segrafia è a buttega nova apre e so porte cù affissi è panni diversi.
Disegni burlerschi
« I disegni sò diversi. Ponu esse intornu à u mare, u sinemà « Jaws », a Corsica di tempi fà cù trè anziani posti nantu à un bancu. I testili si piglianu in u Cuntinente. Per ciò chì tocca à a serigrafia, avemu duie imprese, una di quallà è una di Corsica. »
U resultatu hè propiu bè. U locò assai dinamicu, magliette di tutti i culori cù stampatu « Nustrale », « A patrona » « A donna faci l’omu » « Lascia corre » à mezu à palmi in u disertu, « Libertà », un’uchjata à l’anni ottanta, « Santa molotov », « Juste un verre alors... », è tanti altri. U tuttu sempre intornu à disegni burleschi. « Ci hè dinò un versu cù appena di nustalgia... »
Trè anni dopu à a son creazione, a marca « Canal artistique » face a so strada. Per prova, a buttega hè aperta tuttu l’annu (solu d’estate in u 2021 è 2022). I trè artisiti sò stati chjamati da l’Uffiziu di u turisimu di l’Isula Rossa à l’occasione di u mercatu di Natale, dinò u festivale Creazione in Bastia o u festivale biking. Accantu à una nuturietà chì si sviluppa abbastanza bè, a squadra cuntinueghja à travaglià intornu à l’affissi, u primu cuncettu.
F.P.
Canal artistique
Rue de la forge, 20220 Isula Rossa
www.canalartistique.com
cuntattu : 06-22-30-12-48
Apertura : da u marti à u sabbatu : 10.00-12.00 è 15.00-18.30
