I quaranta anni di << I Voci di a Gravona >>
L'ottu di dicembre , nantu à a scena di u Palatinu
I quaranta anni di « I Voci di a Gravona »
Per festighjà i so quaranta anni, u miticu gruppu pumunticu serà, à l’occasione di a festa di a Nazione, l’ottu di dicembre, nantu à a scena di u Palatinu…
Mette a maiò parte di i membri chì anu cumpostu u gruppu nantu à a scena di u Palatinu, eccu u scopu di u gruppu « I voci di a Gravona » chì anu vulsutu marcà u so quarantesimu anniversariu. Dapoi a so nascita, in u 1983, l’associu hà vistu passà decine di cantadori è musicanti. A prima squadra era cumposta di Ghjuvan Micheli Weber, u tintu Paulu Zarzelli, Federicu Armani, Saveriu Bisgambiglia, Dumenicu Barazza, Ghjuvan Micheli Fortune è Larenzu Mondoloni. « A struttura hè natu in u 1983, spiega Ghjuvan Micheli Weber, ma u gruppu esistia nanzu. Un bellu percorsu. »
Quattru generazione
Dopu à issa squadra, d’altri sò ghjunti à purtà a so petra à issu bellu edifiziu culturale. Trè altre generazione anu seguitatu i primi. A squadra di Ghjuvanni Bisgambiglia, Dédé di Scala, i fratelli Rutili, Antone Paoletti, quella di Larenzu Molini, Antone Tramini, Carminu Belgodere, di Benedettu Rusterucci è in fine l’ultima di Jo Franchi, Paulu Tradii... « Forsa una cinquantena di musicanti è cantadori in tuttu,aghjusta Ghjuvan Micheli Weber, u gruppu era natu in tempi di u Riacquistu cù a particularità, cum’è i Surghjenti, di scriva è di cantà in Pumuntincu. »
Dopu à « Spaventu », u primu dischettu esciutu in 1986, è canzone chì anu fattu a so rinumata (« Quand’elli m’accurderani », « I pastricciali », « Eppo marchjà », « Circinellu », u famosu « Scrivu à tè »), u gruppu n’hà esciutu d’altri nanzu di piantà qualchì tempu è di vultà, dui anni fà, cù una squadra nova è un dischettu novu di quattordeci tituli, chjamatu « I voci di a Gravona »
U spiritu di u Riacquistu
« Tuttu hè pertutu d’un « viotu » in u rughjoni, spiega Paul Tradii, ùu ci era più nudda in tantu chè atteddu in a Gravona. Aviamu rimessu in vali una scola di cantu è di viulinu tradiziunali. À pocu à pocu, u gruppu s’hè ricustituitu... »
Cusì, u gruppu hà esciutu, vinti anni dopu à l’ultimu, un dischettu novu. « I tempi sò scambiati, i sughjetti d’ispirazioni sò varii, sempri intornu à l’attualità ma u spiritu di nanzu hè u listessu. Avemi aghjustatu meludii è strumenti più muderni tinendu u militantisimu chì piglia i so radichi in tempi di u Riacquistu. È cum’è nanzu, i membri di u gruppu sò, per a maiò parti, da a Gravona. »
Cusì, è à l’occasione di u quarantesimu anniversariu di a so nascita, u gruppu hà decisu di marcà l’evenimente è di piglià a scena di u Palatinu. « Avemi sceltu l’ottu di dicembri, hè una manera di mantena u filu principiatu in l’anni ottanta. »
Certi di i membri chì cumponenu u gruppu d’oghje ùn eranu forse micca nati quandu « I Voci » principiavanu u so percorsu in u 1983. Ma quandu sò stati chjamati, « l’anziani » anu subbitu per a maiò parte, datu u so accunsentu. « Ogni « squadra » hà da cantà canzoni di i so tempi. Avemi riesciutu à aduniscia assai mondu per marcà iss’evenimentu. »
Tutte e squadra anu travagliatu da u so cantu per prisentà un spettaculu maiò. L’occasione di sfuglià qualchì pagina di a storia di u gruppu, di u Riacquistu è di u cantu corsu.
Ph.P.
Per festighjà i so quaranta anni, u miticu gruppu pumunticu serà, à l’occasione di a festa di a Nazione, l’ottu di dicembre, nantu à a scena di u Palatinu…
Mette a maiò parte di i membri chì anu cumpostu u gruppu nantu à a scena di u Palatinu, eccu u scopu di u gruppu « I voci di a Gravona » chì anu vulsutu marcà u so quarantesimu anniversariu. Dapoi a so nascita, in u 1983, l’associu hà vistu passà decine di cantadori è musicanti. A prima squadra era cumposta di Ghjuvan Micheli Weber, u tintu Paulu Zarzelli, Federicu Armani, Saveriu Bisgambiglia, Dumenicu Barazza, Ghjuvan Micheli Fortune è Larenzu Mondoloni. « A struttura hè natu in u 1983, spiega Ghjuvan Micheli Weber, ma u gruppu esistia nanzu. Un bellu percorsu. »
Quattru generazione
Dopu à issa squadra, d’altri sò ghjunti à purtà a so petra à issu bellu edifiziu culturale. Trè altre generazione anu seguitatu i primi. A squadra di Ghjuvanni Bisgambiglia, Dédé di Scala, i fratelli Rutili, Antone Paoletti, quella di Larenzu Molini, Antone Tramini, Carminu Belgodere, di Benedettu Rusterucci è in fine l’ultima di Jo Franchi, Paulu Tradii... « Forsa una cinquantena di musicanti è cantadori in tuttu,aghjusta Ghjuvan Micheli Weber, u gruppu era natu in tempi di u Riacquistu cù a particularità, cum’è i Surghjenti, di scriva è di cantà in Pumuntincu. »
Dopu à « Spaventu », u primu dischettu esciutu in 1986, è canzone chì anu fattu a so rinumata (« Quand’elli m’accurderani », « I pastricciali », « Eppo marchjà », « Circinellu », u famosu « Scrivu à tè »), u gruppu n’hà esciutu d’altri nanzu di piantà qualchì tempu è di vultà, dui anni fà, cù una squadra nova è un dischettu novu di quattordeci tituli, chjamatu « I voci di a Gravona »
U spiritu di u Riacquistu
« Tuttu hè pertutu d’un « viotu » in u rughjoni, spiega Paul Tradii, ùu ci era più nudda in tantu chè atteddu in a Gravona. Aviamu rimessu in vali una scola di cantu è di viulinu tradiziunali. À pocu à pocu, u gruppu s’hè ricustituitu... »
Cusì, u gruppu hà esciutu, vinti anni dopu à l’ultimu, un dischettu novu. « I tempi sò scambiati, i sughjetti d’ispirazioni sò varii, sempri intornu à l’attualità ma u spiritu di nanzu hè u listessu. Avemi aghjustatu meludii è strumenti più muderni tinendu u militantisimu chì piglia i so radichi in tempi di u Riacquistu. È cum’è nanzu, i membri di u gruppu sò, per a maiò parti, da a Gravona. »
Cusì, è à l’occasione di u quarantesimu anniversariu di a so nascita, u gruppu hà decisu di marcà l’evenimente è di piglià a scena di u Palatinu. « Avemi sceltu l’ottu di dicembri, hè una manera di mantena u filu principiatu in l’anni ottanta. »
Certi di i membri chì cumponenu u gruppu d’oghje ùn eranu forse micca nati quandu « I Voci » principiavanu u so percorsu in u 1983. Ma quandu sò stati chjamati, « l’anziani » anu subbitu per a maiò parte, datu u so accunsentu. « Ogni « squadra » hà da cantà canzoni di i so tempi. Avemi riesciutu à aduniscia assai mondu per marcà iss’evenimentu. »
Tutte e squadra anu travagliatu da u so cantu per prisentà un spettaculu maiò. L’occasione di sfuglià qualchì pagina di a storia di u gruppu, di u Riacquistu è di u cantu corsu.
Ph.P.
