Un affrescu nantù à a tematica di a cultura à di a fede

Un affrescu religiosu è patrimuniale à u Liceu San Paulu in Aiacciu


Una decina di sculari anu travagliatu dui anni cù l’artistu pittore Adrien Martinetti per realizà un affrescu nantu à a tematica di a cultura à di a fede. Un affrescu chì hè statu prisentatu a settimana scorsa.


Si chjamanu Dumenica, Arthur, Mathias, Andrea, Vannina, Marilou è Laura. Tutti sò scularizatu à u culleghju è liceu San Paulu in Aiacciu (da a quinta à a prima) è tutti sò passiunati d’arte. Cusì è dopu à un prughjettu cuncepitu da u stabilimente, anu participatu à a realisazione d’un affrescu. « U pittore Adrien Martinetti hè ghjuntu à scuntrà ci l’annu scorsu, spiega François Grimaldi, principale di u culleghju è liceu San Paulu, vulia tramandà un pocu di u so sapè fà. Ci hà prupostu di creà un attellu cù sculari. Ci hè un bisognu in Corsica, masimu per ciò chì tocca à l’affreschi. Avemu accettatu a so pruposta, è u prughjettu hà pussutu principià cù un partenariatu liatu à a Cullettività di Corsica. »


Dui anni di travagliu

Da u so cantu, Adrien Martinetti hà pussutu fighjulà issa passione. « Ci era dighjà u talente, preciseghja, ma ci vole à ricunnosce chè ci era dighjà una basa di travagliu. Ci semu ritruvati tutti i mercuri, ancu à l’occasione di e vacanze. Ed avemu travagliatu tutti inseme. »

Per ciò chì tocca à a tematica, i scularti anu sceltu a religione è u patrimoniu. Di fattu, l’affrescu prisenta una vergine chì tene Ghjesù in e so mani. À dritta, un picculu paese è a manca, Ponte Novu... « Hè una tematica chì ci curresponde, aghjusta Vannina (classa di prima), a religione, u patrimoniu è a storia sò tematiche arradicate in Corsica. Avemu travagliatu in issu sensu. »

Sottu à u sguardu d’Adrien Martinetti, i sculari anu pigliatu i pinnelli è appruntatu, pian, pianinu, u so prughjettu. « Fora di i nuli chì supraneghjanu l’inseme è ch’aghju fattu eu, aghjusta l’artistu, i sculari anu fattu tuttu... »

Arthur, elevu di quinta, hà messu, ellu dinò a so grinfia in issu bellu prughjettu induve i zitellu sò ghjunti da per elli. « Mi piace à pinghje, spiega u ghjuvanottu, è quand’u prughjettu s’hè prisentatu, ci sò ghjuntu di manera naturale. »


D’altri prughjetti à vene ?

A settimana scorsa, è dopu à dui anni di travagliu, u resultatu hè statu prisentatu à i respunsevuli di u stabilimente, quelli di u Ritturatu, Don Ghjaseppu Luccioni (Cullettività di Corsica), qualchì parenti è zitelli. È dinò u Cardinale Bustillo. « Hè impurtante di mette l’arte in vale,
spiega quellu, ciò chì hè bellu è bonu, u tuttu in u quadru sculare di a furmazione, l’educazione. Tuttu què hà messu dinò in lume a creatività è u talente di issi ghjovani. »

In fine, Don Ghjaseppu Luccioni hà mintuatu u fattu culturale è artisticu cum’è un solcu per a ghjuventù. « Hè un arnesu maiori pà tutti i ghjovani. A cultura, a religioni, u patrimoniu custituisciani solchi da sviluppà. A Cullettività hà tenutu à participà à u sdo niveddu, à issu prughjettu. » Tuttu u mondu s’hè rallegratu di issu bellu travagliu. Issu prughjettu ùn seria ch’un primu. D’altri puderianu seguità cù d’altre tematiche.

Ph.P.