Rubutiscola : Quandu a lingua corsa si mette à a rubutica
Custruzzione di robo
Rubutiscola : Quandu a lingua corsa si mette à a rubutica
À l’initiativa d’una cunvenzione zifrata da u Retturatu, u culleghju di u Fium’Orbu è u cullettivu « Parlemu Corsu », una decina di zitelli di u stabilimentu anu travagliatu, in u quadru sculara durante sei mesi à a custruzzione di robò. Un primu passu per l’infurmaticu à prò di a lingua corsa…
Un mese fà, u cullettivu « Parlemu Corsu » dava una cunferenza di stampa per prisentà qualchì prughjettu à più o menu cortu andà à prò di a lingua corsa. Frà sti prughjetti, u cuncettu « Rubutiscola » chì hè statu prisentatu a settimana scorsa à u culleghju di u Fium’Orbu. « S’hè trattatu d’un attellu di rubòtica in lingua corsa, spiega Micheli Leccia, capimachja di u cullettivu « Parlemu Corsu », i sculari chì ani participatu à l’attellu, ani ricivutu struzzioni in corsu è so stati cundutti à custruì unu robò è à falli rializà missioni (par vìa d’una prugrammazioni infurmàtica). Hè unu insignamentu in immirsioni, durenti à l’annata sculara è drentu à i stabilimenta. »
20 ore di travagliu
Di fattu, a cunvenzione zifrata di dicembre trà u Retturatu, u Cullettivu è u Culleghju, hà permessu, à partesi di u mese di ghjennaghju à dece zitelli di classa di quarta è terza à participà à iss’attellu un’ora à settimana durante sei mesi (in u quadru sculare ma da 12.30 à 13.30). Nanzu, Jean-Christophe Olmiccia, prufessore di matematiche, hè statu furmatu à a rubotica da Jean-Noël Vignaroli, un specialistu. Inseme, anu custruitu cinque robò (duie vitturelle, un focu rossu è dui lochi « spettaculu di lume » è appruntatu un percorsu cù murza, rena, legò è cartò. A particularità d’iss’attellu hè chì s’hè fattu in lingua corsa cù l’aiutu di Maria Dumenica Tafani, prufessore di corsu. L’inseme hè sbuccatu nantu à un percorsu induve e vitture si divianu piantà in qualchì locu da piglià passaghjeri, piantà dinò à un focu rossu è compie cù lume è codeci in « morse » da ringrazià. « Hè un parcorsu d’una minuta,aghjusta Micheli Leccia, pari cortu ma riprisenta quantunqua ori è ori di travaddu, masimi chì i ziteddi ani cuntinuatu u prughjettu in casa. »
U resultatu hè statu prisentatu a settimana scorsa à u culleghju. Cù u scopu riesciutu, ci vole à dilla, di purtà i zitelli à a lingua corsa à traversu una disciplina chì li piace.
Allargà u cuncettu in d’altri stabilimenti
« Hè una riesciuta, cuntinueghja Micheli Leccia, ma avemu da circà à andà ancu più luntanu. Hè sicura in fini chì unu insignamentu di rubotica porta u scularu à sviluppà u so sensu logicu è à piddà l’abitudina, di pettu à un prublema, di spona argumenta par
ghjustificà i suluzioni ch’eddu pruponi. Acquista cussì una ginnastica intilittuali chì li pò ghjuvà in tutti i disciplini è ben intesu par ciò chì tocca à l’imparera di a lingua. Or u cuntrariu hè vera dinò : un ciarbeddu avvezzu à manighjà dui o parechji lingui duventa ghjunchevuli è favuirisci a criazioni di cunnizzioni novi, utuli par fà diduzzioni lògichi !
Rubutiscola duventa tandu u prugettu di dui disciplini cumplimintarii ch’è no pudemu riassuma in una frasa : A rubotica à prò di a lingua corsa è a lingua corsa à prò di a rubòtica ! »
L’idea seria avà di sparghje un cuncettu altrò.
Questu annu, avemu avutu una decina di ziteddi. S’è noi ghjunghjimu à avè ne deci in ogni culleghju, saremu à più di 300. Da quì à deci anni è ancu di menu, s’è noi pudemi allargà l’idea à tutti i scoli è licei, avaremi 3000 sculari à travaddà in lingua corsa, nantu à issa timatica quì. Si pudaria dinò rifletta, à longu andà, à distribuì premii, pà a prisentazioni in lingua corsa, è pà u prughjettu stessu. »
Ci seranu, da quì à pocu reunione cù u Retturatu in issu sensu quì. Per sbuccà forse, à a rientrata 2024-2025, nantu à un’altra « Rubutiscola » di settembre.
Ph.P.
