Scola di Cantu : una canzona in umaggiu à Yvan Colonna
U quattru di lugliu scorsu, hè esciuta « Monte Barbatu », una canzona dedicata à a memoria d’Yvan Colonna. Scritta da Dumè Santelli è cumposta da Thomas Wingert, hè stata registrata in u studiò Ricordu, da a scola di Cantu…
Scola di Cantu : una canzona in umaggiu à Yvan Colonna
U quattru di lugliu scorsu, hè esciuta « Monte Barbatu », una canzona dedicata à a memoria d’Yvan Colonna. Scritta da Dumè Santelli è cumposta da Thomas Wingert, hè stata registrata in u studiò Ricordu, da a scola di Cantu…
A scola di Cantu, un cuncettu natu in l’anni ottanta da Natale Luciani da permette à i ghjovani d’amparà u cantu sacru è prufanu è ancu e canzone. Quaranta anni dopu, è masimu guasgi vinti anni dapoi ch’ellu hè sparitu Natale, a squadra face a so strada. Sò avà, guasgi diciottanni ch’ella hè purtata da Gilles Andreani, cù Jean-André Orsoni è a famiglia di Natale, sviluppendu, ogni volta, cù parechje tematiche : cantu in paghjella, canzone, ghitarra, tuttu què 150 zitelli, ghjovani è maiò à partesi d’ottu. Durante issa perioda quì, unepochi di canzone sò esciute. Frà elle, « Di virtù » (2021) o ancu « Lettera Ghjuventù » (2023) in u spiritu di « Sognu » di 1983.
Un spiritu militante
Qualchì tempu fà, Dumenicu Santelli, chì scrivò isse duie canzone, n’hà scrittu una particulare : « Monte Barbatu », in umaggiu à Yvan Colonna. « Issa canzona, spiega Gilles Andreani, ùn hè stata fatta cù un spiritu puliticu postu ch’edda hè cantata da ziteddi è ghjovani. Saria piuttostu un spiritu militanti pà un omu chì hè statu difensori di a Corsica. Monti Barbatu, sò i me loca, loca di caccia. Hè quallà chè Yvan hè statu chjappu. A so anima ci hè sempri. »
A canzona hè stata registrata d’aprile scorsu, cumposta da Thomas Wingert, « un anzianu di a scola chì ci hà principiatu à l’età di 10 anni. ». Ma i respunsevuli anu vulsutu sceglie u quattru di lugliu per fà la esce. « Hè un quattru di luddu ch’eddu fù arrestatu Yvan. Avemi sceltu issu ghjornu quì ghjust’à puntu. »
Una canzona in umaggiu à Ghjuvan Santu Santoni
« Monte Barbatu », hè stata cantata u 29 di ghjugnu scorsu in Carghjese. A scola ferà a prima parte di i « Chjami Aghjalesi » u 7 d’aostu. È forse qualchì data in più. A squadra purtata da Gilles Andreani, ella, cuntinueghja a so strada. « Fù difficiuli in i primi tempi, aghjusta quellu, avà si pò dì ch’edda viaghja abbastanza bè. Parechji ghjovani passati pà a Scola, cantani in certi gruppi, o faceni parta di a noscia struttura. »
Di settembre, si ripliglierà l’amparera : ghitarra (Ange-François Alasta), cantu in paghjella (Sampieru Andreani), cantu (Thomas Wingert è Cécilia Cauchi), lingua corsa (Priscilla Valle) è viulinu. « Semi tutti benevulenti. Hè impurtanti di dà ciò ch’eddi ani amparatu. » Strada facendu, ziteddi è ghjovani, anziani è nuvelli, anu da cuntinuà l’amparera. Frà e nuvità, una canzona dedicata à Ghjuvan Santu Santoni, chì s’era tombu u 22 di dicembre di u 2017, vittimu di fastidiu in u liceu agricolu di Sartè. « Ci voli à sensibilizà i nosci ghjovani à nantu à issi drama è issu fattu chì tocca dinò à noscia sucetà. »
Una canzona chì escerà un sette di dicembre, ghjornu induve fù sparitu Natale Luciani. Temi d’oghje, umaggi, storia, memoria, cultura, a scola di cantu cera sempre à cantà tuttu ciò chì tocca a sucetà corsa ughjinca. Cerchendu sempre à mantene a fiara iniziata in l’anni ottanta da u tercanu di u cantu è u spiritu corsu…
F.P.
