Festiballu face u so ritornu
<< Tutti in Piazza >>
Festiballu face u so ritornu
Purtata da l’associu « Tutti in piazza », una manifestazione maiò s’hà da tene issu sabbatu è dumenica in Sermanu è Corti, à mezu à tutti i passiunati, sunadori di viulinu. Cù invitati di marca ghjunti da a Scozzia è l’Irlanda…
« Tutti in Piazza » festighjeghja i so trentottanni. Un’associu purtatu durante tuttu issu tempu, da Alain Bitton dettu Minicale, è una squadra di tercani, ballerini o sunadori. Cù, ogni volta, a passione di sunà è fà campà a musica tradiziunale è sopratuttu u ballu : valsu, scuttiscia, masurca, polca è ancu i balli più anziani (manfarina, saltarellu, ecc…). Ma l’associu hà sempre vulsutu andà più luntanu, cunnisciutu ch’ellu hè, per ciò chì tocca à u famosu quadrigliu, un ballu ch’ùn hè tantu vechju ind’è noi ma chì a fattu a so strada, masimu cù un impegnu maiò ind’è e scole. « Avemu circatu à mudernizà appena issu ballu, spiega Minicale, da dà lu un fiatu novu cù d’altre figure create, andendu, dinò à circà altrò, figure... »
Cusì, una manifestazione maiò hè nata in l’anni 1990-2000 in Sermanu, unu di i lochi i più cunnisciuti di Corsica per u ballu è sopratuttu u strumentu chì u face campà : u viulinu. « I dui ùn si ponu spiccà, aghjusta u capimachja di l’associu, u viulinu hè u strumentu chì face ballà ma ci n’hè d’altri cum’è l’urganettu per indettu. »
Mantene a tradizione
In Sermanu, tutti l’anni, i sunadori si ritruvavanu per fà ballà a ghjente. Dopu avè amparatu in issu paese di u Boziu, masimu i Sermanacci cum’è i Turchini, i ghjovani sunadori anu circatu altrò d’altre manera di sunà : Fium’Orbu (Achilli), Pastricciola (Pinelli), Figari, induve esistenu tradizione di viulinu. Oghje, quantu seranu à mantene iss’usu ? Guasgi trenta per una manera « tradiziunale » di sunà, di più s’è no aghjustemu tutti quelli chì sò passati per u classicu. D’altronde, ùn ci vole micca oppone i dui.
Hè per mantene u ballu tradiziunale è iss’usu anticu chè Festiballu face u so ritornu issa dumenicata in Sermanu, induve a tradizione hè sempre viva, è in Corti. Una manifestazione sparita in u 2014 è vultata appenuccia in u 2017.
A Corisca, l’Irlanda è a Scozzia
Si tratta cù u Festiballu 2024 di fà rinasce a tradizione cum’è nanzu aghjustendu cunferenze è atteli durante dui ghjorni. Cusì, a manifestazione principierà u sabbatu in Corti cù una cunferenza di Minicale à u museu di a Corsica à nantu à a storia è l’evoluzione di u quadrigliu in Corsica dapoi u XIXe. Si tratterà dopu di u diploma di cantu è musica tradiziunale chì s’hà da apre di settembre à l’Università di Corsica. Una serata dedicata à a mandulina è un ballu cù musicanti scuzzesi hà da compie issa prima ghjurnata (David Morrison à l’urganettu, Iane Bayne cù e percussione è Douglas Ballantines à u viulinu, tutti ghjunti da Glasgow).
A dumenica, u Corsican Set (ballerini cunfirmati) nanzu à un ballu induve sò l’Irlandesi ch’anu da vene à mustrà u so sapè fà. I gruppi Seamus è Fidelma Ballew. In fine, i musicanti di « Tutti in Piazza » è tutti l’amichi sunadori, anu da compie issu dui ghjorni à son di balli corsi. Forse un soffiu novu per una tradizione, sempre vivi ind’altri paesi, ma chì si perde à pocu à pocu in Corsica induve ci eranu sunadori in tutti i rughjoni.
Purtata da l’associu « Tutti in piazza », una manifestazione maiò s’hà da tene issu sabbatu è dumenica in Sermanu è Corti, à mezu à tutti i passiunati, sunadori di viulinu. Cù invitati di marca ghjunti da a Scozzia è l’Irlanda…
« Tutti in Piazza » festighjeghja i so trentottanni. Un’associu purtatu durante tuttu issu tempu, da Alain Bitton dettu Minicale, è una squadra di tercani, ballerini o sunadori. Cù, ogni volta, a passione di sunà è fà campà a musica tradiziunale è sopratuttu u ballu : valsu, scuttiscia, masurca, polca è ancu i balli più anziani (manfarina, saltarellu, ecc…). Ma l’associu hà sempre vulsutu andà più luntanu, cunnisciutu ch’ellu hè, per ciò chì tocca à u famosu quadrigliu, un ballu ch’ùn hè tantu vechju ind’è noi ma chì a fattu a so strada, masimu cù un impegnu maiò ind’è e scole. « Avemu circatu à mudernizà appena issu ballu, spiega Minicale, da dà lu un fiatu novu cù d’altre figure create, andendu, dinò à circà altrò, figure... »
Cusì, una manifestazione maiò hè nata in l’anni 1990-2000 in Sermanu, unu di i lochi i più cunnisciuti di Corsica per u ballu è sopratuttu u strumentu chì u face campà : u viulinu. « I dui ùn si ponu spiccà, aghjusta u capimachja di l’associu, u viulinu hè u strumentu chì face ballà ma ci n’hè d’altri cum’è l’urganettu per indettu. »
Mantene a tradizione
In Sermanu, tutti l’anni, i sunadori si ritruvavanu per fà ballà a ghjente. Dopu avè amparatu in issu paese di u Boziu, masimu i Sermanacci cum’è i Turchini, i ghjovani sunadori anu circatu altrò d’altre manera di sunà : Fium’Orbu (Achilli), Pastricciola (Pinelli), Figari, induve esistenu tradizione di viulinu. Oghje, quantu seranu à mantene iss’usu ? Guasgi trenta per una manera « tradiziunale » di sunà, di più s’è no aghjustemu tutti quelli chì sò passati per u classicu. D’altronde, ùn ci vole micca oppone i dui.
Hè per mantene u ballu tradiziunale è iss’usu anticu chè Festiballu face u so ritornu issa dumenicata in Sermanu, induve a tradizione hè sempre viva, è in Corti. Una manifestazione sparita in u 2014 è vultata appenuccia in u 2017.
A Corisca, l’Irlanda è a Scozzia
Si tratta cù u Festiballu 2024 di fà rinasce a tradizione cum’è nanzu aghjustendu cunferenze è atteli durante dui ghjorni. Cusì, a manifestazione principierà u sabbatu in Corti cù una cunferenza di Minicale à u museu di a Corsica à nantu à a storia è l’evoluzione di u quadrigliu in Corsica dapoi u XIXe. Si tratterà dopu di u diploma di cantu è musica tradiziunale chì s’hà da apre di settembre à l’Università di Corsica. Una serata dedicata à a mandulina è un ballu cù musicanti scuzzesi hà da compie issa prima ghjurnata (David Morrison à l’urganettu, Iane Bayne cù e percussione è Douglas Ballantines à u viulinu, tutti ghjunti da Glasgow).
A dumenica, u Corsican Set (ballerini cunfirmati) nanzu à un ballu induve sò l’Irlandesi ch’anu da vene à mustrà u so sapè fà. I gruppi Seamus è Fidelma Ballew. In fine, i musicanti di « Tutti in Piazza » è tutti l’amichi sunadori, anu da compie issu dui ghjorni à son di balli corsi. Forse un soffiu novu per una tradizione, sempre vivi ind’altri paesi, ma chì si perde à pocu à pocu in Corsica induve ci eranu sunadori in tutti i rughjoni.
