A rivista << Rigiru >> Hà celebratu i so cinquanta anni
Un percorsu di vintisei numeri
A rivista « Rigiru » hà celebratu i so cinquanta anni
À l’occasione di l’anniversariu di a famosa rivista nata in u 1974 è sparita vintisei anni dopu, fundatori è passiunati di lingua corsa s’eranu ritruvati à u « Chalet », dopu à Vizzavona, per sparte intornu à a litteratura corsa…
Semu in l’annu 74, in pienu riacquistu. A lingua corsa, ch’esistia ma d’un’altra manera trà e duie guerre cù a Muvra è ancu in l’anni cinquanta, cumencia à fà a so strada cù duie prime riviste : Monte Cinto (1964) è u Muntese (1972). In l’annu 1973, à l’occasione di l’Università d’estate, si tratta di creà un libracciolu tuttu in lingua corsa. U scopu hè di fà cunnosce a litteratura corsa rispettendu tutte e so varietà. U tuttu intornu u pinsamentu di l’antichi. « Rigiru » hè in marchja. Luggi Muri, Rinatu Coti è Dumenicu Antone Gerononimi ne sò i fundatori. U primu numeru di a rivista escerà u primu di lugliu di u 1974. Una rivista chì s’apria à a lingua è a litteratura corsa ma ancu à a litteratura furestera tradutta in corsu.
Un percorsu di vintisei numeri
Cinquanta anni dopu, Dumenicu Antone Geronimi, unu di i trè fundatori, Petru Leca, Ghjacumu Fusina è Ghjuvan Ghjaseppu Franchi, tutti tercani di a lingua corsa, si sò ritruvati à u « Chalet » sottu à Vizzavona per una reunione induve u scopu era di marcà l’evenimentu di i cinquanta anni. À fiancu à elli, Ludovic Baris, anzianu studiente in lingua corsa. Ghjè ellu chì hè statu à l’iniziu d’issu prughjettu. « In u 2020, spiega u ghjuvanottu, avia fattu a me tesa nantu à ghjust’à puntu, sta rivista. Ma ùn fù micca ricunnisciuta per via di a crisa sanitaria. Cusì, qualchì annu dopu, aghju avutu l’idea d’invità parsunalità di a lingua corsa per marcà l’evenimentu. »
Nata in u 1974, a rivista trimisinca hè sparita, in u 1990 dopu à vintisei numeri. « Ci hè statu una prova di fà la ripiglià nantu à internet, aghjusta Ludovic Baris, ma ùn s’hè pussutu fà. »
Bench’ellu fussi micca à l’iniziu-ùn era ancu natu !- l’anzianu studiente cunnosce propiu bè u sughjettu sviluppatu durante guasgi 400 pagine à l’occasione di a so tesa. « A reunione era solu dedicata à noi stessu. U scopu fù di ripiglià qualchì testu è di scambià... »
Un’altra reunione d’ottobre
Sturiette, fole, ambiu di a sucetà di nanzu, comu fà per mantene u pinsamentu di l’antichi ind’una sucetà d’oghje monda più muderna induve u mondu pasturale d’eri sparisce à pocu à pocu, comu fà campà a litteratura è a lingua oghje, eccu unepochi di tematiche sviluppate à l’occasione d’issu mumentu. « A ghjente hè pessima oghje ma pensu chè a lingua ripiglia fiatu. Per ciò chì tocca à a litteratura, avemu parsunalità impurtante cum’è Jérôme Ferrari, Marceddu Jureczek, Marcu Biancarelli, Ghjilormu Ferrali è tanti altri... »
A reunione di « U Chalet » seria, forse u puntu di partanza d’una nova demarchja. « Quessa quì, era privata. Avemu da circà à fà ne un’altra d’ottobre ma aperta à u publicu sta volta. Da creà una dinamica nova nantu à a litteratura corsa d’eri, oghje è di dumane. Sempre cù u scopu di rispettà tutte e parlate... »
L’occasione, forse di fà nasce un’altra rivista…
F.P.
À l’occasione di l’anniversariu di a famosa rivista nata in u 1974 è sparita vintisei anni dopu, fundatori è passiunati di lingua corsa s’eranu ritruvati à u « Chalet », dopu à Vizzavona, per sparte intornu à a litteratura corsa…
Semu in l’annu 74, in pienu riacquistu. A lingua corsa, ch’esistia ma d’un’altra manera trà e duie guerre cù a Muvra è ancu in l’anni cinquanta, cumencia à fà a so strada cù duie prime riviste : Monte Cinto (1964) è u Muntese (1972). In l’annu 1973, à l’occasione di l’Università d’estate, si tratta di creà un libracciolu tuttu in lingua corsa. U scopu hè di fà cunnosce a litteratura corsa rispettendu tutte e so varietà. U tuttu intornu u pinsamentu di l’antichi. « Rigiru » hè in marchja. Luggi Muri, Rinatu Coti è Dumenicu Antone Gerononimi ne sò i fundatori. U primu numeru di a rivista escerà u primu di lugliu di u 1974. Una rivista chì s’apria à a lingua è a litteratura corsa ma ancu à a litteratura furestera tradutta in corsu.
Un percorsu di vintisei numeri
Cinquanta anni dopu, Dumenicu Antone Geronimi, unu di i trè fundatori, Petru Leca, Ghjacumu Fusina è Ghjuvan Ghjaseppu Franchi, tutti tercani di a lingua corsa, si sò ritruvati à u « Chalet » sottu à Vizzavona per una reunione induve u scopu era di marcà l’evenimentu di i cinquanta anni. À fiancu à elli, Ludovic Baris, anzianu studiente in lingua corsa. Ghjè ellu chì hè statu à l’iniziu d’issu prughjettu. « In u 2020, spiega u ghjuvanottu, avia fattu a me tesa nantu à ghjust’à puntu, sta rivista. Ma ùn fù micca ricunnisciuta per via di a crisa sanitaria. Cusì, qualchì annu dopu, aghju avutu l’idea d’invità parsunalità di a lingua corsa per marcà l’evenimentu. »
Nata in u 1974, a rivista trimisinca hè sparita, in u 1990 dopu à vintisei numeri. « Ci hè statu una prova di fà la ripiglià nantu à internet, aghjusta Ludovic Baris, ma ùn s’hè pussutu fà. »
Bench’ellu fussi micca à l’iniziu-ùn era ancu natu !- l’anzianu studiente cunnosce propiu bè u sughjettu sviluppatu durante guasgi 400 pagine à l’occasione di a so tesa. « A reunione era solu dedicata à noi stessu. U scopu fù di ripiglià qualchì testu è di scambià... »
Un’altra reunione d’ottobre
Sturiette, fole, ambiu di a sucetà di nanzu, comu fà per mantene u pinsamentu di l’antichi ind’una sucetà d’oghje monda più muderna induve u mondu pasturale d’eri sparisce à pocu à pocu, comu fà campà a litteratura è a lingua oghje, eccu unepochi di tematiche sviluppate à l’occasione d’issu mumentu. « A ghjente hè pessima oghje ma pensu chè a lingua ripiglia fiatu. Per ciò chì tocca à a litteratura, avemu parsunalità impurtante cum’è Jérôme Ferrari, Marceddu Jureczek, Marcu Biancarelli, Ghjilormu Ferrali è tanti altri... »
A reunione di « U Chalet » seria, forse u puntu di partanza d’una nova demarchja. « Quessa quì, era privata. Avemu da circà à fà ne un’altra d’ottobre ma aperta à u publicu sta volta. Da creà una dinamica nova nantu à a litteratura corsa d’eri, oghje è di dumane. Sempre cù u scopu di rispettà tutte e parlate... »
L’occasione, forse di fà nasce un’altra rivista…
F.P.
