"Diversità faci ricchezza " prupone " u Marcatu di l'arti "
U collettivu d'associ culturali natu in u 2018 urganizeghja una manifestazione issu sabbatu ....
« Diversità faci ricchezza » prupone « U Marcatu di l’Arti »
U Cullettivu d’associ culturali natu in u 2018 urganizeghja una manifestazione issu sabbatu durante tutta a ghjurnata nantu à a piazza di u mercatu d’Aiacciu. L’occasione di prumove l’attori culturali è di truvà un spaziu (fora di e sale) per permetteli di scambià cù u publicu…
« A cultura hè ciò chì ferma quandu ci semu scurdati di tuttu » dicia Edouard Herriot tempi fà. Una frasa chì piglia tuttu u so sensu, oghje chì quellu siscu mette a pianetta sana à paghjolu. Dapoi avà un annu, i spazii culturali sò vioti da per tuttu in Francia è in a maiò parte di i paesi di u mondu. Cù e cunsequenze ch’è noi pudemu misurà. Cunsequenze ancu più difficiule ind’è noi in Corsica, induva, a cultura riprisenta monda d’una parte, pocu impreme l’arte, è permette da l’altru à attori di pudè campà.
Quand’elli sceglieni d’aduniscesi in cullettivu qualchì annu fà, l’Aghja, Locu Teatrale, Scenina, Creà Corsica…, volenu apre di più u spaziu culturale à l’attori. « Ùn aviani micca abbastanza a parolla, spiega Mariu Sepulcre, unu di i respunsevuli di u Locu Teatrale, u scopu era nanzi à tutti di prumova iss’artisti... »
Mantene una leia cù u publicu...
Quattru anni dopu-à pocu pressu-, a situazione hè stata scambiata. Saria ancu peghju. Ma a lotta, ùn hè più listessa... Ùn si tratta micca, oghje, di dà a parolla à l’attori culturali cum’è un attu appena puliticu di pettu à una situazione naziunale induve a piazza di a cultura riprisenta pocu. Si tratta solu di fà campà a cultura à un’epica induve per via d’una situazione sanitaria, ecunomica è suciale pisia in u mondu sanu. « Ùn s’agiscia micca di luttà, aghjusta l’artistu, ma di truvà suluzioni per fà chì a cultura trovi una piazza. D’un puntu di vistu ecunomicu, tuttu u mondu a sà, l’affari ùn scambiarini micca per avà. Vulemi sopratuttu mantena una leia cù u publicu... »
Ghjè cusì ch’elle sò nate azzione : davanti à a Prifettura o di ghjennaghju scorsu, un’adunita maiò nantu à a piazza di u Diamante cù parechji artisti in tutti i duminii (teatru, ballu, cantu, pittura, musica,..)
« Issa manifestazioni hè stata una riesciuta maiò. U scopu, per noi, hè di mantena u ritimu d’una adunita ogni mesi. »
Cusì, l’attori s’anu da ritruvà issu sabbatu nantu à piazza di u Mercatu d’Aiacciu. In leia cù a Merria (accunsentu di Simone Guerrini, eletta in carica di a cultura, è sunurisazione di i servizii tecnichi. Senza sminticà l’accordu di a Prifettura è u rispettu, di sicuru, di u protocollu sanitariu). « Per l’artisti, a situazioni hè difficiuli. U statutu di l’intermittenti chì anu u numaru d’ori, hè mantenuntu, per d’altri hè più cumplicatu...Ci saranu dunque artisti (pittura, scultura, fotò…) è qualchì musicantu. »
A mostra principierà à 10.00 di mane per compie à 17.00 cù a trumbetta di Jo Carboni è u pianò d’Eric Testeguide. « Accunciemi dighjà a manifestazioni di u mesi di marzu cù teatru per i zitelli è forsa, viulini è ghitarri... » Un’adunita chì permetterà à l’artisti di pudè sparte un mumentu piacevule cù u publicu...Una manera, à tempu, di mantene un filu culturale è suciale necessariu in tempi d’oghje…
Ph.P.
