CAPES di corsu : a piulata !
Dopu à a decisione, di u Ministeru di l’Educazione naziunale di mudificà e prove di u Capes di e lingue vive, l’inchietudine piglia a suprana nanzu à tuttu in Corsica.
Capes di Corsu : a piulata !
Dopu à a decisione, di u Ministeru di l’Educazione naziunale di mudificà e prove di u Capes di e lingue vive, l’inchietudine piglia a suprana nanzu à tuttu in Corsica. D’un cantu, pulitichi, sindicati è insegnanti di corsu aduniti intornu à u listessu sintimu d’inghjustiza. È da l’altru, u Retturatu chì ghjustificheghja sta decisione cù l’argumentu di a capacità à insegnà…
U mondu linguisticu insulanu hè azezu è inchietu cù a decisione, dopu à l’arrestatu di u 25 di ghjennaghju scorsu, di u Ministeru di l’Educazione Naziunale, di rifurmà, i Capes liati à l’insegnamentu d’una lingua. D’una manera cuncreta, u scambiamentu saria maiò per ciò chì tocca à u corsu : si tratta, quì di scambià i cuefficienti. Sin’à d’avà, eranu di sette per u corsu è quattru per u francese. Oghje, hè u cuntrariu : u corsu fala à 4 è passa à u doppiu per u francese (8). A parte a più impurtante saria, à partesi di a messa in piazza d’issa riforma in u 2022, saria per u francese. Dapoi sta decisione, tutti, pulitichi, sindicati è insignanti sò azezi. « Sta decisione, ci dà l’impressione chè a cumpetenza linguistica ùn hè più priuritaria, spiega Ghjaseppu Turchini, respunsevule di u Cullettivu di l’insignanti di corsu, peccatu chè, pian, pianinu, a lingua corsa principiava à truvà u so spaziu...Hè una rimessa in causa di u sistema educativu dedicatu à a lingua corsa. Ùn lu pudemu accettà ! »
S’agisce, per tutti l’attori impegnati à prò di l’insignamentu di a lingua corsa, d’un altru « culpacciu » dopu à a riforma di u basciliè induve u cuefficiente di corsu uzziunale era calata da dui à 0,6.
Versu mubilisazione maiò ?
Mentre ch’ellu si tratta d’inghjustizia per ciò chì tocca à e lingue regiunale, l’Educazione Naziunale, ella, vole ghjustificà issa misura nova. « E prove di u Capes di e lingue vive devenu permette di misurà, certu, e cumpetenze linguistiche di i candidati, ma si tratta à tempu, per a ghjuria, di valutà a so capicità à ensegnà chè i candidati sò nanzu à tuttu prufessori... »
Issa riforma inchieta ancu aldilà d’indè noi. I Brittoni, per indettu, anu datu u so parè. « Oghje, a trasmissione di e lingue regiunale in e scole hè in periculu, in Brittagna, Uccitania, Paese Bascu, Corsica. Ci era quantunque una certa dinamica è si ne sparisce pianu pianu. »
In Corsica, hè l’inseme di u secondu gradu chì hè minacciatu. Chè, ci vole à dilla, a prugressione hè abbastanza debule. Senza cunta, fora di e scole, una situazione, torna una volta, periculosa (numaru di lucutori indebulitu)...
« Ci simu spiccati da e decisione zifrate cù u Statu in u 2016, precisa da u so cantu, Saveriu Luciani, cunsiglieru esecutivu incaricatu di a lingua corsa, si trattava tandu di a generalisazione di l’insignamentu di u u corsu è ne simu luntanu... »
Una prima mubilisazione davanti à u Retturatu hè stata urganizata u mese scorsu. Forse ùn basterà micca…
Ph.P.
« Sapè fà » : una tematica nova di u JDC
U vostru settimanale si vole impegnà à prò di l’artisgiani isulani. Masimu quelli chì cercanu l’eccelenza. Cusì, hè nata issa tematica nova « Sapè fà ». Mesinca è in lingua nustrale. I nostri artisgiani custituiscenu u pulmone ecunomicu di a Corsica. Ma ùn sò micca abbastanza valurizati « piattati» daretu à pudenze più maiò, micca artisgianale ma forte per cummunicà. Vulemu prufittà d’issa tematica per lampà una chjama à tutti quelli chì volenu fà valè tutti issi mistieri, omi è donne chì tramandanu un sapè fà nustrale è di qualità .
Quale hè ch’ùn hà micca un artisgianu intornu à ellu ? Chjamateci o lasciateci u so numaru...
